Lider di Fraccion di POR den Parlamento, Dellanire Maduro durante conferencia di prensa a elabora riba e tema di recorte di 5 miyon den AZV. El a expresa cu for di aña pasa a bin ta atendiendo riba un di e condicionnan cu Hulanda a pone pa e ayudo financiero brinda na Aruba pa atende cu e crisis di Corona, esta e cortamento di 5 miyon for di e fondo di AZV.
Pero tambe a puntra e parlamentario di e situacion na hospital unda cu trahadonan no kier entrega mas e 5%.
E reduccion aki, el a bisa, ta un sacrificio cu henter pueblo di Aruba mester haci. “Nos tur mester a haci sacrificio. Con e ta bay sigui tambe nos kier sa. P’esey nos kier sa for di gobierno con e combersacionnan cu minister Knops a bay pa sa con ta sigui cu resto di aña’ki. “
Di aña pasa caba e comision Salubridad di Parlamento a bin ta coordinando y a topa cu e sindicato. Despues a keda di sinta cu hospital y gerencia. A palabra algo, pero despues mester a pospone pa e luna aki, cu nos ta pendiente di dje. Tambe tin programa un reunion cu minister di salud publico.”
Si e por bisa, segun e parlamentario, cu e situacion ta uno hopi fastioso. E dunadonan di cuido ta sacrificando masha hopi, trahando oranan extra. E ta kere cu mester atende cu e asunto aki di un forma diligente pa, apesar cu ta den crisis, sali di un forma positivo di e situacion.
Di otro banda el a papia di e situacion en general den cuido di salud. DI pashentnan cu kier drecha nan condicion pero cu no sa e caminda pa caminda. Den e proceso aki, el a bisa, e POH-nan cu por haya na diferente dokter di cas, ta di gran ayudo den guia di pashentnan cu malesanan cronico. Ta duna guia entre otro con pa stop di huma, cu sigur lo ta beneficioso pa salud.
AZV
Riba e cortamento di 5 miyon den AZV tambe el a papia, cual ta un preocupacion di dje. Na diferente ocasion, el a yega di bisa cu esaki mester haci esaki den forma diligente y no manera ta e situacion ainda pasobra keto bay ta incomprendibel con a haci e calculacion di 5 miyon.
A trece e punto aki dilanti tambe na e representantenan di Hulanda durante reunion di IPKO (reunion interparlamentario di paisnan den Reino) y a pidi nan pa nan input den esaki mirando cu ta un situacion sumamente doloroso pa comunidad.
Siguiendo riba e tema aki, por a tende cu dialuna tabatin un tipo di protesta na Hospital, cual ta comprondibel tambe, mientras cu ta spera cu e reunionnan entre gerencia y sindicato di enfermeronan continua diamars y diaranson y asina lo wak con e situacion lo sigui desaroya.
Dellanire lo desea di haya sa mas informacion riba e reciente bishita di Secretario di Estado Knops na Aruba detayenan di e landspakket, con largo Aruba tin cu sigui contribui na e recorte aki, specialmente na e recorte di salud, cu a bin hustamente na momento di crisis den salud y cual ta haci incomprendibel.
Mas aleu parlamentario di POR ta considera cu ta importante pa bin cu un impact study. Prome cu bisa cu ta bay corta X suma di salario of presupuesto, por garantisa kico e impacto ta bay ta, ki consecuencia esey lo bay tin y esaki no a tuma luga.
“Pa nos esey ta importante pa por hustifica na nos hendenan dicon ta sigui cu e cortamento y dicon mester stop’e. Mi ta contento di por a scucha cu hospital ta haciendo nan tarea pa demostra ki impacto esaki ta bay tin si continua cu ne”.
