Autoridad a lanta marduga pa haci algun entrada hudicial na diferente adres. Famia Susebeek na Esmeralda, na Noord, a haya bishita prome cu solo a sali. Ta link e comerciante Pieter Susebeek cu ex minister Benny Sevinger den e caso Avestruz. Masha tempo no a tende di e caso. Probablemente ta tratando di haya pruebanan pa purba link e ex mandatario na actonan ilegal durante gobernacion di AVP. Ta varios adres a drenta caba y despues di mas cu dos aña ainda ta buscando mas prueba cu por hinca e ex minister Benny Sevinger den un caso penal te corte.
Ta conoci cu Pieter Susebeek tin amistad cu e ex mandatario. E ta amigo personal di e ex mandatario. Mescos cu esaki a drenta otro adresnan den pasado. Awe na drenta e cas na Esmeralda y e oficina La Hacienda situa na Coral Plaza. E famia aki tin varios propiedad y ta conoci den negoshi di Real Estate. Fiscal y Hues Comisario tambe a bishita e adresnan. A tuma varios ora den e cas y oficina cobando y analisando documentonan. Tambe a mira con ta coba den auto buscando documentonan. Lo keda pendiente pa e informacion oficial di Ministerio Publico den e investigacion Avestruz cu ta continua cu mas entrada hudicial.
A drenta cas di parlamentario Benny Sevinger atrobe
Separa di cas di famia Susebeek, a bishita cas di ex Minister Benny Sevinger atrobe na Paradijswijk. Esaki ta di dos biaha cu ta bishita e cas. E prome biaha a bay cu varios caha di documento. E biaha aki a bay cu e telefon celular di casa di e parlamentario.
Investigacion “Avestruz”
E investigacion “avestruz” ta relaciona cu otorgamento di terenonan di Gobierno, durante cual a comete soborno of falsificacion di documento, y den algun caso labamento di placa, segun Ministerio Publico. Concretamente, e investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di Pais Aruba den e añanan 2009 te 2017. Ademas ta investiga e rol di un minister anterior den esaki.
Dia 2 di october 2019 a haci no menos di 9 entrada hudicial. For di mainta a bishita cas di ex Minister di Infrastructura, y asina despues a sigui pa Leoncita Arends; Gaby Werleman; Freddy Every; Fast Delivery; Oficina politico di Benny Sevinger; cas di Neme den Bachstraat; cas di Neme na Palm Beach y oficina di Neme na The Village. Tambe a haci inval na Corsou, relaciona cu e mesun investigacion aki.
Pues en total 9 entrada hudicial for di 7:00am te cu 4.30pm guia pa Fiscal mr. Pronk y Hues Comisario mr. Sap, den combinacion cu funcionarionan di Landsrecherche y RST. Tambe a haya ayudo di funcionarionan di Hulanda, mirando e cantidad di personal necesario pa haci tur e trabou aki.
OM: Investigacion Avestruz a conduci na razzianan awe
Awe Landsrecherche bao guia di hues comisario y den cooperacion cu Cuerpo Policial di Aruba y RST (Recherche Samenwerkingsteam),a tene huiszoeking na seis diferente sitio. E huiszoekingnan aki a tuma luga den cuadro di un investigacion di Landsrecherche di delitonan di corupcion posiblemente cometi rond di entrega di terenonan di gobierno entre 2009 y 2017.
E investigacion ta conoci como Avestruz. Durante e huiszoekingnan a tuma den beslag riba cargadonan di data y administracion.
Pa awor no tabatin ningun detencion. Avestrus, den cual tambe ta investigando e posibel rol di un ex-minister, ta dirigi riba e pregunta si companianan a haya derecho di erfpacht a base incorecto. A keda cla mientrastanto cu e huiszoekingnan di awe. E investigacion Avestruz ta continua. Na e momento aki Ministerio Publico lo no duna mas informacion. Si lo tin mas desaroyonan pa meld den e investigacion aki, Ministerio Publico lo comunica pa medio di relatonan di prensa.
