Esunnan cu a pasa den e dianan aki dilanti Harbour Arena, den cura di Aruba Ports Authority, por a tuma nota di trabounan andando pa instala tent y pone baricadanan. Trahadonan di DOW a prepara henter e tereno pa por haci testnan masal di Covid-19 sinta den auto, pues estilo Drive Thru. Gobierno ta adelanta cu infrastructura den caso cu e cantidad di casonan sigui subi of si Merca sigui cu su plan.
T’asina cu Gobierno Mericano ta evaluando pa exigi un test negativo di Covid-19 for di tur pasahero internacional cu yega Merca. Si tuma e decision final, esey lo nifica cu e medida lo drenta na vigor diamars dia 26 di januari 2021. Gobierno kier evita cu e casonan positivo ta sigui aumenta na Merca y den esey, kier cuida e pais di otro hendenan cu por yega di otro pais contagia cu e virus.
E idea ta pa ora yega Merca, pa mustra un PCR Test negativo, haci no mas cu 3 dia prome cu e vuelo. Ya hopi otro pais na mundo tin e exigencia aki caba pero awor Merca ta evalua pa haci mesun cos pa tur estado Mericano. Ya caba a cuminsa exigi un test negativo di tur pasahero procedente for di Inglatera. Esaki specialmente awor cu Inglatera a descubri un mutante di e virus.
Biahamento pa Merca a cay drasticamente. Imagina cu na december 2020 a nota un caida di 76% di e cantidad di vuelonan internacional mientras cu pasaheronan no-residente a cay cu 82%, si compara e mesun luna di aña 2019.
Na Aruba mientrastanto e cantidad di contagionan ta sigui aumenta. No por bisa cu esey ta debi na turistanan cu ta yega cu e virus sino mas bien na e comportacion di nos comunidad mes, den cual contagio na cas ta resaltando. Laboratorio di Hospital, conoci como LabHOH ta conduciendo e testnan aki y diariamente ta nota filanan largo di auto pa haci test, den cura patras di Hospital mes. Pero si acaso e casonan sigui aumenta y tur pasahero bayendo Merca lo mester test prome, lo considera pa muda e instalacionnan pa Harbour Arena pa por atende mas pashent pareu y evita cu ta stagna trafico.
