DC-ANSP, e empresa na Mahuma enkargá ku kontròl di tráfiko aéreo, ta kompletamente al dia ku su kuentanan anual te i ku 2017.
Aparentemente a base di deklarashonnan di e miembro di Staten pa PAR Curtley Obispu hasí den un reunion di parlamento a inkluí DC-ANSP den un lista di instansianan di gobièrnu ku lo ta lat ku nan kuentanan anual. Esei a sali publiká asina tambe den diferente medio di komunikashon.
Echo ta sinembargo ku DC-ANSP konforme e reglanan legal vigente a prepará su kuenta anual di 2017 na ora loke seguidamente a haña tambe un deklarashon di aprobashon di akountent. Despues e Hunta di Komisario a aprobá e kuenta anual ya menshoná. Seguidamente a presentá e kuenta anual atrobe na tempu na ‘AVA’ (reunion general di akshonista). Na sèptèmber último AVA a trata i aprobá e kuenta anual di 2017 kaminda nan a duna deskarga na Gerensia i Hunta di Komisario di DC-ANSP.
Ku otro palabra, DC-ANSP ta kompletamente al dia, manera lei ta preskribí, i no ta pertenesé den e lista en kestion.
