Parlamentario independiente Daphne Lejuez tabata orador den prome y segunda tanda den e reunion publico den Parlamento. For di distancia el a sigui e reunion, ya cu e no tabata tin turno mas.
Mirando cu e tin un yiu vulnerabel, el a mantene su distancia, y a indica cu el a keda hopi sorpresa mirando cu a desvia hopi di e reglamento di orden, cual el a haya straño.
Si kier tin un organo cu ta duna respet y un organo cu ta sigui regla y ta pidi pa hendenan sigui regla, mester duna ehempel.
Tambe e parlamentario a indica cu si tin un punto di agenda cu ta un mocion di desconfiansa y ta cambia e strekking di e reunion na caminda, no ta haya cu esey ta corecto tampoco.
Mester rond af cu e minister, cu e ta haya of no ta haya un mocion di desconfiansa, y despues yama un otro reunion pa trata e temanan cu a trece dilanti.
Parlamentario Lejuez ta sigui indica cu el a bin specificamente pa wak e documentonan cu minister Marisol Lopez-Tromp a trece dilanti. El a papia un tiki cu e minister en cuestion y a pidi pa por fabor, ora e yega na su turno den su disertacion di segunda tanda, pa e tuma tempo pa e splica e contexto di cada un di e documentonan cu el a entrega.
Ta un tiki dificil pa djis wak e documentonan sin compronde e relacion of e contexto di cada un di e documentonan den su declaracionnan haci.
A warda un rato pa scucha e minister su splicacion pa asina sa di kico e documentonan specificamente kiermen.
Desaroyo di e reunion
Segun Lejuez, a tende hopi cos, menos pa locual e reunion a wordo yama. Tambe e ta kere cu e tema principal no a wordo trata. Te ainda no a mira ningun mocion di desconfiansa cu a keda presenta na e minister.
Tin un mocion si aparentemente di un di e miembronan di Parlamento, pero no tin un mocion di desconfiansa. E pregunta ta keda kico ta haciendo.
Si tin corupcion, varios colega, incluyendo Lejuez ta pidi pa yama un reunion separa pa loke ta contenido pa loke cu Lopez-Tromp a trece dilanti y pa enfoca esey so. No pa purba di hacie den un otro reunion, cu un otro tema.
