Diadomingo anochi pa 9:36pm a sosode un accidente hopi serio na Pos Chikito, net dilanti di Irian Restaurant pabou di Ex DTI. E homber peaton a bay crusa caya y na dado momento e Hyundai Accent A-4690 color blanco bayendo direccion pariba a dale.
E peaton a hasta dal den windshield. Djey el a cay dilanti di e auto. E dama chauffeur tabata den shock. Personal di ambulance a chek e victima y no por a haci nada pe. Djey a atende cu e dama chauffeur tambe. A cuminsa un investigacion grandi na e sitio.
Pa 10:50pm Dr Texiere a constata morto di Luis Carlos Niebles naci dia 30di Juli 1964 na Colombia. Na e sitio a presenta specialista di trafico, Polis Forensico y slachtofferhulp. Fiscal a laga tuma e curpa di e victima den beslag, mescos e auto tambe a wordo tuma den beslag pa mas investigacion. Ambulance a bay cu e dama chauffeur di e auto hospital pe haya tratamento medico mirando cu el a keda den shock. E caso ta bao investigacion.
Cuerpo Policial Aruba ta manda palabra di condolencia na famia di e fayecido.
