A bin ta tende comentario bou pueblo, preocupacionnan pa cu e awa di dama na Morgenster, “E awa aki ta contamina,” ta un di e comentarionan. Esaki sinembargo ta un ponencia cu Randy Maduro, vocero di Sta Rosa ta nenga categoricamente.
E awa di dama ta destina pa muha mata of uza den plantacion y criaderonan. Ta prohibi pa uz’e pa cualkier otro cos, e vocero a duna di conoce.
Den pasado a yega di sosode cu autonan di chica pos ta uza e damnan pa deshaci di nan awa, pero esaki ta prohibi. E no ta awa cu por uza tampoco door di carwashnan y tampoco pa pega bloki.
P’esey semper ta haci apelacion na bisiñanan cu na momento di mira cualkier iregularidad pa bati alarma na Polis. Nan ta e unico instancia cu por duna un boet. Esaki ta un autoridad cu Santa Rosa no tin.
Unico cos cu nan por haci, pa siguridad, cera un dam pa cierto temporada.
Pa loke ta e comentarionan cu e awa aki ta contamina, el a rechasa esaki categoricamente. Normalmente ta controla e awa di dam, hunto cu Departamento di Salud Publico dos te tres biaha pa aña. Na maart ultimo a controla e awa y el a sali bon. Pues ciudadanonan cu ta uza esaki pa nan criadero of plantacion, no mester preocupa.
Na final un biaha mas el a haci apelacion na ciudadanonan pa uza e awa di dam pa solamente loke e ta destina p’e.
