Diahuebs ultimo a inicia un reunion publico den Parlamento pa Gobierno di Aruba, tur 8 Minister di Gabinete Wever-Croes por a suministra informacion actualisa di con nan ta atendiendo cu asunto di finansa. Sinembargo, e reunion no a termina diahuebs y a programa pa e sigui diabierna mainta. Esey tampoco a sosode!
Probablemente falta di comunicacion interno a haci cu no tabata consciente cu dos Parlamentaria di coalicion (MEP y POR) a dicidi di bay disfruta di un fin di siman na Curacao North Sea Jazz Festival na nos isla ruman. Consecuentemente ora a habri e reunion diabierna a sinti falta di dos miembro, haciendo cu e mayoria limita di 12 asiento di coalicion a bira 10, cu ta menos di e 11 rekeri. Pa evita un problema inecesario den e reunion di Parlamento, a opta pa pospone e reunion pa dialuna mainta atrobe.
Sinembargo, problema cu Insel Air pa trece nos Arubianonan bek for di Corsou a causa cu e Parlamentarianan a keda pega na nos isla ruman y no a logra biaha pa Aruba bek manera planea. Awe marduga rond di 12:00am a informa e Parlamentarionan cu a pospone e reunion atrobe pa tempo indefini.
Awor cu e Parlamentarianan yega bek di nan fin di siman di concierto, otro 8 Parlamentario di MEP-POR-AVP lo biaha pa Argentina pa henter e siman aki, debi na reunionnan di Parlatino. E ora atrobe lo bo tin quorum pa atende e reunion importante aki pa actualisa Parlamento riba desaroyonan rond di nos finansa publico y pa sa si ta cumpliendo cu e acuerdonan cu CAFt por ehempel.
E Parlamentarianan no a conta cu Insel Air lo haya fayo tecnico cu lo obstaculisa nan regreso na tempo pa cumpli cu nan trabou, pues awor Parlamento ta keda henter un siman “plat” y e reunion publico lo continua riba un otro fecha, ora cu tur Parlamentario y Ministernan ta na Aruba pa sigui traha atrobe.
