Awe nochi pa 10:00pm a bati alarma grandi pa candela den Kowloon Restaurant, situa den Emmastraat, den centro di Oranjestad. A spacha dos unidad di polis na e sitio y dos unidad di Brandweer mescos tambe ta tecniconan du NV Elmar. Na yegada caba no a topa cu ningun candela na e sitio, sino mas bien poco huma na e parti pafo. Bomberonan a constata cu huma tabata sali for di e fusebox.
Un oficial di Cuerpo di Bombero a bisa nos cu “ta algo normal”, argumentando cu ora awasero cay, cu awa por penetra den e fusebox y causa un fayo. Den casonan asina, a yega di sosode mas biaha caba, cu e fusebox ta cuminsa saca huma pisa. Particular den esaki ta cu no a desconecta coriente na e restaurant y coriente a sigui normal.
Gerente di e restaurant tabata presente pasobra ta net nan a cera. Pues no tabatin ningun hende den e establecimento mas, ni trahado ni tampoco cliente. Tecniconan di NV Elmar a presenta mesora pa por a atende cu e reto di coriente na e fusebox.
Na final ta parce cu no tabatin candela mes, sino mas bien huma cu a spanta e bisiñanan y a activa bomberonan. Di otro banda, un peaton a pasa bisa “e cuminda di Kowloon ta hot awe”.
Kowloon Restaurant, situa den Emmastraat 11 ta existi desde aña 1975 caba, funda door di defunto Netto Arends. Aña pasa na september el a haya e “seyo di oro” di e Aruba Health and Happiness Code como ehempel di ta cumpli cu tur regla nobo di higiena y protocol di salud impone dor di Ddepartamento di Salud Publico y Aruba Tourism Authority. E ta habri tur dia for di 11:00am pa 9:00pm.
