Carnaval 2021 na Sint Maarten ta planea pa tuma luga entre dianan 13 di april pa 2 di mei 2021, pero awe Conseho di Minister a dicidi pa cancela tur cos. No solamente carnaval, sino tambe e Heineken Regatta cu ta planea pa tuma luga entre 4 pa 7 di maart 2021 na Sint Maarten Yacht Club. Ta dos evento importante pa e pais, tanto pa localnan pero specialmente pa turismo. E motibo? Covid-19.
Gobierno di Sint Maarten a uza como argumento cu no ta responsabel, teniendo cuenta cu interes general di salud publico di ciudadanonan di e isla Caribense. A tuma e decision aki despues di consulta diferente stakeholder importante, manera ta profesionalnan medico y di husticia. A presenta un plan cu actividadnan limita pa ambos evento, pero na final e decision tabata pa cancela ambos pasobra ni cu e limitacionnan no por garantisa cu lo no tin aglomeracion y posibel contagio entre localnan y turistanan.
Un di e aspectonan cu a tene masha na cuenta ta e aumento den cantidad di casonan positivo y e forma stabiel con halto e casonan activo ta manteniendo nan mes. Ta premira cu e casonan lo sigui aumenta den e dianan nos dilanti y cu carnaval e lo por bira pio so. Gobierno ta premira tambe cu e proceso di vacuna e comunidad lo tuma luga precisamente den e mesun temporada ey, pues cu autoridad lo no tin suficiente hende pa maneha ambos evento.
