Si bo pasa banda di Eagle Beach aworaki bo por tuma nota di e cantidad di tent cu tin den algun area di hendenan riba ful swing di campamento. Den un area specifico na Eagle Beach net un poco mas despues di e entrada mas pabao, tin un grupo di famia y amistadnan cu ta campando hunto pa varios decada, pa cuarentiseis aña pa ta exacto un di e damanan ta bisa nos.
Den combersacion cu un di e campadonan, Roxenne Mathilda, e ta conta cu actualmente na Eagle Beach nan tin sigur un 35 aña ta campa. “E tabata iniciativa di mi mayornan, nan semper ta den e parti aki, vooral april semper nos ta campa akinan na Eagle Beach.” E famia ta bini hunto y prepara nan propio cuminda, hunga wega di carta y varios otro actividad sano hunto durante e siman di campamento.
Aworaki e tecnologia ta asina avansa cu e muchanan ta ful den nan telefon, antes e tabata poco otro, pero e tradicion toch ta sigui. “Ban sigui cu e tradicion, nos mes a cuminsa di mi mayornan y awor ami tin hopi aña tambe ta campa, te hasta awor e ta bayendo na mi yiunan,” Mathilda ta conta. Actualmente ta di tercer generacion cu ta campando. E ta manda un mensahe na e otronan pa semper corda comparti cu famia.
“Y siña e siguiente generacion tambe, pasobra nan ta bin den un generacion hopi mas avansa cu nos, cu hopi tecnologia. Awendia bo ta experiencia algo completamente diferente, cu wega, lama y relahacion. Mas social, comunicando hopi mas cu otro den bon conexion cu tur hende.”
