Economia di Aruba ta sigui crece e aña aki, pero na un ritmo mas modera cu na aña 2025. Banco Central di Aruba (CBA) ta pronostica un crecemento economico real di 3,7% pa 2026, mientras inflacion ta subi pa 2,4%. Esaki ta encera cu, aunke actividad economico ta aumenta, consumidornan lo enfrenta mas presion di prijs.
E cifranan ta aparece den e informe Economic Outlook – Real Sector di september 2026. Segun e calculonan di CBA, economia a crece cu 6,3% na 2025, despues di un crecemento di 5,5% na 2024. Pa e aña aki, gastonan di hogar y entradanan di turismo ta e motornan principal di crecemento.
E pronostico di 3,7% ta trata di crecemento real: un aumento den actividad economico despues di coregi pa cambionan di prijs. Nan ta calcula un crecemento nominal di 4,8% pa 2026.
Mas gasto di hogar ta sostene economia
CBA ta calcula cu consumo priva lo aumenta cu 6,3% den terminonan real e aña aki. Consumo total, cu ta inclui tambe consumo di Gobierno, lo crece cu 4,7%.
Segun e informe, mas empleo y medidanan di sosten financiero ta contribui na e aumento aki. E banco ta menciona, entre otro, e aumento di pension AOV y reparatietoeslag, y e reduccion di prima AZV pa pensionadonan na januari 2026.
E medidanan aki ta duna hogarnan mas espacio pa gasta. Na mes momento, mas actividad den turismo y construccion ta crea demanda pa trahadornan, cu tambe ta contribui na consumo.
Turismo ta sigui crece
Pa 2026, CBA ta pronostica un aumento di 3,7% den cantidad di bishitante cu ta pasa anochi na Aruba. Exportacion turistico, esta e bienes y servicionan cu Aruba ta bende na bishitantenan, lo aumenta cu 4,4% den terminonan real.
E crecemento aki ta sigui riba un aña 2025 den cual Aruba a ricibi 1.515.102 bishitante cu a pasa anochi, un aumento di 6,6%.
Sinembargo, e informe ta mustra cu cantidad di turista so no ta determina resultado economico. Duracion di estadia, tipo di alojamiento y gasto pa anochi tambe ta conta. Na 2025, por ehempel, e estadia promedio a baha di 6,9 pa 6,8 dia.
E dependencia di turismo ta mantene Aruba sensitivo pa cambionan den demanda internacional. Un economia mas debil den mercadonan principal, menos conexion aereo of cambionan den gasto di bishitante por afecta e resultado final.
Falta di personal ta un reto pa crecemento
CBA ta pronostica un aumento di 5,6% den empleo pa 2026. Pero cu e mercado laboral local caba bou presion, Aruba lo depende fuertemente di trahadonan for di exterior pa sostene e expansion. Specialmente e actividad den construccion y e aumento di capacidad di hotel ta genera necesidad pa mas personal. Segun CBA, e escasez di trahado tambe por crea condicionnan pa indexacion salarial den sector priva.
E disponibilidad di personal ta, pues, un condicion importante pa e pronostico. Si reclutamento of proceduranan di inmigracion tarda, esaki por limita produccion, retrasa proyectonan y frena crecemento economico.
Prijsnan a subi mas cu na 2025
Mientras inflacion promedio na 2025 tabata solamente 0,1%, CBA ta calcula cu e cifra lo alcanza 2,4% e aña aki. E informe ta atribui e aceleracion principalmente na prijsnan internacional mas halto di petroleo, relaciona cu tensionnan geopolitico den Medio Oriente. Combustibel y transporte mas caro ta afecta prijsnan directamente, pero tambe indirectamente via e gastonan cu empresanan ta haci pa importa y distribui producto.
Pa consumido, esaki ta significa cu e aumento den actividad economico ta compaña pa un aumento mas fuerte den costo di bida. Un crecemento di economia, pues, no ta implica automaticamente cu cada hogar lo sinti e mesun mehoracion den su poder di compra.
Inversion ta crece pero na un ritmo mas limita e aña aki
CBA ta pronostica un aumento real di 2,5% den inversion total pa 2026. Inversion priva lo crece cu 2,4%, mientras inversion publico lo aumenta cu 9,5%.
Importacion tambe lo subi, cu un crecemento real calcula na 4,7%. Esaki ta relaciona cu e necesidad di bienes y servicionan for di exterior pa sostene consumo, turismo y proyectonan di construccion.
CBA ta subraya cu e ehecucion di proyectonan ta depende di factornan manera permiso, financiamento, disponibilidad di personal y e costo di material. Retrasonan den e areanan aki por cambia e resultado economico.
Petroleo caro ta forma un riesgo importante
Fuera di su pronostico principal, CBA a calcula un escenario menos favorabel den cual prijs di petroleo ta keda halto te na final di 2027. Pa 2026, e diferencia ta relativamente limita: crecemento economico lo alcanza 3,5%, en bes di 3,7%, y inflacion lo subi pa 2,5%, compara cu 2,4% den e escenario principal.
Segun e informe, e calculo pa 2026 ta asumi cu e cobertura financiero contra fluctuacion di prijs di petroleo, conoci como hedging, ta proteha consumidornan contra parte di e impacto riba tarifanan di awa y coriente.
Pa 2027, e riesgo ta mucho mas grandi. Si petroleo keda caro y e proteccion aki no ta disponibel bou di e condicionnan asumi den e escenario adverso, crecemento economico por baha te 0,4% y inflacion por subi te 4,9%. Esaki lo afecta poder di compra y frena gasto di hogar.
Crecemento ta sigui den menos velocidad
Den e escenario principal, CBA ta pronostica un crecemento economico di 2,3% pa 2027, cu inflacion di 1,4%. Mas aleu, e banco ta calcula un crecemento di 2,1% na 2028, 1,7% na 2029 y 1,0% na 2030.
Pa e aña aki, e perspectiva ta keda uno di expansion, sosteni principalmente pa gasto di hogar y turismo. Pero e pronostico ta depende di disponibilidad di personal, ehecucion di inversion y desaroyonan internacional, particularmente prijs di energia y e situacion economico den mercadonan di cual Aruba ta ricibi su turistanan.
