Tanto riba Facebook, como oficialmente, Cristian Soto Garcia a anuncia su retiro for di fila di Accion 21. Mediante di un carta manda pa directiva el a indica cu e kier hala atras di inmediato.
E carta ta bisa lo siguiente: “Desde 1 di juli mi persona den e chatgroup di e partido a anuncia cu, mirando kico tur ta pasando na e momento ey, cu tin division pisa den e partido, hopi wega di redo, midimento di poder y buscamento di beneficio personal, ta distancia di tal chatgroup. Manera mi a comunica, mi a pidi reunion cu lider di e partido, Miguel Mansur, pa wak kico lo ta e siguiente paso.
Durante e reunion cu sr. Mansur, dia 2 di juli, mi a bis’e cu mi lo bay ta den un posicion ‘non- actief’, sperando desaroyonan interno y pa wak con esaki lo ta maneha. Lastimamente mi mester bisa cu despues di declaracionnan haci door di Mansur den prensa, el a bira cla pa mi cu un liderazgo di division, di kier demostra poder extremo y di ego, no ta algo cu mi lo por forma parti di dje. Desde prome reunion mi tabata hopi cla cu mi lealtad ta na pais Aruba y no na un partido.
Mi semper lo bisa e cosnan manera cu mi ta wak nan y pa mi un lider ta unifica, guia y pusha bay dilanti manera un team. E ta traha pa ‘nos’ y no pa ‘mi’. Mi ta termina cu un quote cu casualmente mi a lesa di un miembro di partido y e ta bisa: “Integrity is holding to our convictions regardless of the consequences and never compromising our ideals or values, even if it affects the bottom line.”
