Como un miembro di hopi aña di Resorts Condominiums International (RCI), un organisacion funda na aña 1974, miembronan doño di un time-share na Costa Linda Beach Resort tin acceso na mas di 4200 otro hotel rond mundo. Di otro banda, Costa Linda Beach Resort ta yama bonbini tur aña na miles di huesped cu tambe ta haci uzo di e programa di intercambio di camber anualmente.
Israel Gonzalez, den representacion di RCI, conoci como un netwerk di biahamento mundial y lider den intercambio di vakantie, a biaha pa Aruba pa entrega e “RCI Excellence in Service Resort Award” personalmente na Luigi Heredia, gerente general di Costa Linda Beach Resort.
Durante su añanan di existencia, Costa Linda Beach Resort a ricibi varios “RCI Gold Crown Resort Award” den forma consecutivo. Esey ta nifica cu Costa Linda Beach Resort continuamente ta alcansa y surpasa e standard stipula den area di huousekeeping, mantencion, hospitalidad y front office, durante tur evaluacion di e facilidadnan di e hotel y su servicionan.
“Mi ta yama danki y ta felicita tur empleado pa e logro aki. Ta door di boso trabou duro y dedicacion cu a pone cu Costa Linda Beach Resort a logra yega na e reconocimento internacional aki”, asina Luigi Heredia a duna di conoce.
Costa Linda Beach Resort a habri su portanan na November 1991. E hotel tin no menos di 160 camber y ta conta cu 130 empleado den servicio directo. E tin un di e beachnan di mas largo y hancho su dilanti.
