Diaranson Hues a tuma decision den un caso cu tabatin di un grupo di ciudadano contra Minister encarga cu Medio Ambiente, Desaroyo Teritorial y Infrastructura. Tambe contra e compania Three Rivers. Un total di dies ciudadano a cuminsa caso contra e dos instancianan menciona pero tambe Fundacion Parke Nacional Aruba.
E decision ta cu minister mester reacciona riba e bezwaar di e dos personanan riba su decision tuma. Minister no a reacciona pasobra el a cataloga cu nan bezwaar ta ‘niet ontvankelijk’. Pues cu nan no tin nada di bisa. Pero Corte awo a destrui e decision di e minister pa cual e MESTER reacciona riba nan bezwaar den tres luna di tempo. Y tambe Corte a schors e decision di minister di 28 di mei, 2020 (pa duna permiso di construccion na Three Rivers) te ora cu e minister tuma un decision riba e bezwaar di e dos ciudadanonan.
Di e grupo, solamente a honra peticion di dos ciudadano mientras cu a rechasa esun di e otronan. E motibo cu nan wordo rechasa ta cu prome cu nan bay LAR, nan mester a entrega un bezwaar contra e decision di e minister dia 28 di mei 2020, pa otorga permiso di construccion na Three Rivers. Nan a bay den bezwaar berdad pero laat. Esey ta e motibo cu nan demanda den e caso aki tabata inadmisibel, mientras cu e otro dosnan cu a bay na tempo si a wordo trata y otorga.
Den TREMPAN por lesa mas di e caso aki.
