E compania di aviacion di Corsou, esta EZ Air a perde un caso den Corte y consecuentemente lo mester cambia su nomber, logo y tur otro asunto cu ta forma parti di nan imagen corporativo y demas material di promocion y mercadeo. Parce cu e nomber ta competi cu un otro compania di aviacion cu no a duda den subi trapi bay hues pa pidi un decision na su fabor.
E compania Ingles, esta EasyJet a claim EZ Air na Corsou cu nan ta uzando e nomber cu e palabra “easy” den dje sin cu esaki ta legal a base di derecho di autor internacional cu e compania aki ta dispone di dje.
Doño di EZ Air, René Winkel a confirma cu berdad pronto e compania lo mester bay haci un “rebranding”, cu nomber, logo y tur cos nobo, debi cu no por sigui cu e nomber actual. Esaki lo mester tuma luga riba un termino corto.
Tambe lo mester traha un website pa booking di pasashi completamente di nobo y tur esaki lo tuma tempo. Pronto lo anuncia e nomber nobo di EZ Air, den cuadro di e “rebranding” di e compania.
A funa EZ Air na mei di aña 2000 na Boneiro. E ta conoci pa realisa buelonan di Air Ambulance, pero cu añanan a crece den un aerolinea regional, bulando entre islanan ABC y algun ciudad di Colombia. Awendia nan ta conta cu cinco avion; dos Air Ambulance y tres avion modelo Saab 340 cu ta carga 34 pasahero.
