Un delegacion di reino ta bayendo Colombia. Minister di economia di Corsou, Steven Martina a splica cu Corsou tambe ta participando mescos cu Aruba. Esaki ta un bon iniciativa pasobra ta bay presenta nan mes como reino y como Corsou, ta bay specificamente como pais. Pero e hecho di ta parti di un delegacion grandi asina aki, ta yuda, e ta crea, e ta habri porta.
E relacion cu Colombia ta un relacion sumamente constructivo. Turismo di Colombia ta crece casi 10% compara cu aña pasa.
Pesey Colombia ta un di e paisnan cu Corsou ta identifica pa por estrecha lasonan comercial. Ta haciendo esey caba pa loke ta trata e parti di agricultura. Na Riohacha e universidad eynan ta traha cu e sector di agricultura na Corsou. A firma un MoU tambe cu e ciudad di Medellin pa yega na explora con por yega na negoshi of relacionnan mas desaroya, por ehempel riba e parti di cultura.
Awor aki ta bay atrobe pa duna un continuidad na e diferente acuerdonan cu a cera dia cu a bay aña pasa.
Interes di comercio local
Tin interes di comercio local. Segun minister Martina, tin mas di 10 empresa inscribi caba. Por lo general ora cu haci un mision pa bay Colombia ta haya hopi participante. Awor aki ta den un bachi di reino. Ta bay haya mesun tanto cu a haya semper of kisas hasta mas.
Cumpramento di carni na Colombia
E mandatario a splica cu procesonan di inspeccion di carni ta haci cu e departamentonan ta hopi alerta. Lo sigui haci inspecicon pero hopi mas pisa, door cu na e momentonan aki a identifica e riesgo di carninan procedente di Venezuela, via di Colombia, cu por drenta Corsou y Aruba.
Proyecto di baca
Tabata tin un intencion di bin cu baca di Colombia. Segun e minister, e proyecto aki ainda ta den fase di factibilidad. Ta un proyecto basta grandi pasobra ta trata mil baca. Na e momentonan aki ta haciendo diferente investigacion pa wak si e factibilidad por en berdad na Corsou y e por cumpli cu tur e diferente regla y normanan di medio ambiente pa por crea tanto baca asina na Corsou.
Inversion
Esaki ta un inversion completamente priva. Unico cos cu gobierno ta haci ta pone e tereno disponibel. Loke ta trata e negoshi mes, ta completamente priva.
Carni ta bin for di diferente area. Venezuela ta uno, pero tambe Colombia y via Merca tambe diferente carni ta bin.
Corsou ta importa for di diferente origen, pasobra ta haya steaknan di origen Argentino, pero tambe di Brazil, Merca y Venezuela y Colombia.
