Corsou: Partido Democraat ta boga pa un Parlamento redusí na 15 Parlamentario

214

Na e momentunan aki nos pais ta na un krusada sumamente importante, e nesesidat den pueblo ta urgente i grandi pero si no trata palabrashonnan den Parlamento ta nifiká ku e yudansa tan nesesario for di Reino no ta yega. Asina fásil i kompleho e situashon ta alabes.

Bon funshonamentu di un gobièrnu mayoria bia ta mará na bon funshonamentu di e Parlamento ku ta eksistí na e momentu ei. Parlamento su tarea prinsipal ta kontrolá i pone gobièrnu responsabel pa e forma ku gobièrnu ta hiba su gobernashon. Den esaki ta e kalidat di e Parlamento ta konta i no su kantidat.

Pueblo mediante su voto ta skohe e Parlamento ku tin ku bai represent’é. Pueblo ta ferwagt ku e parlamentario ta represent’é dígnamente, esaki independientemente di kua gobièrnu ta gobernando. Un Parlamento fuerte i kritiko kontra ministernan di su propio koalishon lo sòru pa e nivel di gobernashon subi di forma signifikante.

P’esei Partido Democraat, pa medio di su lider polítiko Elsa Rozendal, ta boga pa un Parlamento fuerte i kritiko. Asta e mester ta kritiko kontra di su mes ministernan na momentu ku Partido Democraat ta den gobièrnu. Tambe mirando e situashon finansiero prekario ku nos pais ta pasando aden, Partido Democraat ta boga pa redusí e kantidat di parlamentarionan te na 15 enbes di 21. Tambe esaki ta bon momentu pa kuminsá pensa pa redusí e kantidat di ministerionan te na 6 enbes di 9.

Den un pais kaminda e sirkunstansianan a kambia drástikamente e aserkamentu pa tantu Parlamento i gobernashon tambe mester ta diferente, asina Elsa Rozendal ta finalisá.