Minister Charles Cooper tabata tin un encuentro di cortesia cu Embahador di Reino Hulandes pa Republica Dominicana, Frank Keurhorst e siman tras di lomba. Minister Cooper a haci uzo di e ocasion aki pa trece diferente punto di importancia dilanti. Esaki tabata relaciona cu conferencia titula Latin America and Caribbean Cyber Competence Centre (LAC4), cu ta tumando luga actualmente na Santo Domingo. Corsou ta buscando un aliansa cu LAC4.
Gobierno di Corsou a institui un grupo pa atende cu siguridad cibernetico. E grupo aki ta encabesa pa Minister Cooper, cu e meta pa crea un structura di siguridad cibernetico pa Corsou, tanto pa gobierno como pa sector priva. Pa atende cu siguridad cibernetico, maneho cibernetico y crimen cibernetico. E grupo ta consisti tambe di Minister di Husticia, Minister di Asuntonan General, y Minister di Gobernacion, Planificacion y Servicio Publico.
E prome paso di e grupo lo mester ta, pa desaroya un strategia cibernetico nacional y apunta un autoridad cibernetico nacional. Den e cuadro aki, Minister Cooper a bishita e conferencia CANTO, a reuni cu NCSC, como tambe bishita e evento HACKSHIELD. Minister Cooper ta participa tambe ta LAC4 na Santo Domingo.
E interes y ambicion ta pa Corsou bira un hub cibernetico di LAC, pa laga nos centro di data bira un partner strategico di HACKSHIELD na Hulanda. Tur dos e actividadnan aki lo por tin un spin-off positivo pa Corsou.
Pa por logra esaki, lo mester inverti fondo pa por crea e structura legal, desaroya capacidad, crea consciencia y ehecuta e strategia cibernetico.
E siguiente paso lo ta cu Corsou ta acerca Straatsburg pa via di Conseho Europeo, Corsou por bira parti di e programa OCTUPUS. Den esaki ta tene cuenta tambe cu e fondonan cu tin mester pa por realisa e SDG’s cu World Bank pa pone na disposicion, entre otro pa subi e resistencia cibernetico di e paisnan
Loke ta importante ta pa Corsou tene cuenta, cu a pesar di ta un isla chikito, tambe por bira parti di iniciativa y oportunidad internacional.
