Den e ultimo 24 oranan, Spaña tin 410 caso nobo di morto pa motibo di Coronavirus. Segun Ministerio di Salubridad di Spaña, esaki ta e cifra di mas abou desde 1 luna. E cantidad di fayecidonan diario ainda ta hopi halto na e pais, pero a baha hopi despues cu dia 2 di April a registra 950 morto den un solo dia!
Diasabra a registra mas di 560 fayecimento. Spaña ta e di 3 pais, despues di Merca y Italia, cu mas di 20.000 morto door Coronavirus. E cantidad di contagio na Spaña a subi diadomingo di 191.726 pa 195.944. Spaña ta e di dos pais rond mundo cu contagio di Coronavirus despues di Merca cu tin 738.923, ta e pais den Europa cu mas contagio, sigui pa Italia cu 175.925.
Ta mustra cu e cantidad di morto y cantidad di hendenan contagia a stabilisa. Segun e Ministerio di Salubridad, e medidanan fuerte tuma a haci un impacto pa stabilisa e cifranan. Prome Minister Pedro Sánchez a bisa cu e lo puntra Parlamento pa alarga e medidanan te cu 9 di Mei. E medidanan lo ta un tiki menos fuerte, asina por ehempel muchanan por bay pafo tin biaha.
“E parti extremo a keda nos tras”, Sánchez a bisa den un conferencia di prensa. “Pero esey no ta suficiente y nos ta keda pendiente. Nos no mester tuma decisionnan pura”. E control na Spaña ta un hopi streng. Siman pasa a duna 330.000 hende boet of aresta pasobra no a mantene nan mes na e reglanan.
