Ta parce cu na Servicio di Telecomunicacion di Aruba (SETAR) N.V., e proceso pa reduci salario y beneficionan di trahadonan lo no bay sin e debido discusion. E sindicato cu ta representa trahadonan ta boga pa elimina henter e Raad van Commissaris, y no di SETAR so, sino di tur otro compania estatal. Esaki den un esfuerso pa corta gasto innecesario!
Comisarionan di SETAR ta esunnan miho paga
STT a informa trahadonan cu cada miembro di e Hunta di Comisarionan, apunta pa Gobierno, ta cobra mas o menos 4 mil florin pa luna pero ta presenta 2 biaha pa aña pa reunion. Ta trata aki di Eumar Koolman, Rubinah Bernadina, Nelson Oduber, Joseph Everon y Theodulo (Theo) Kock. STT kier pa nan stop di cobra y bay cas mesora, prome cu corta den salario di esunnan cu si ta torah tur dia, mas cu 8 ora pa dia.
Situacion finananciero/economico di Aruba
Aruba ta practicamente den bancarota, cu GDP alcansando 104% y perdiendo 10 miyon florin pa dia na turismo. Presidente di Sindicato STT, Jeromin Kelly, ta preocupa p’e situacion aki y ta kere cu nos tur mester yuda, no solamente e compania estatal y ambtenaarnan pero henter Aruba. E plan cu Gobierno ta introduciendo no ta encera Aruba completo.
STT a reuni “online”
Sindicato di Trahadonan den Telecomunicacion (S.T.T.) a haci un presentacion na su miembronan, gran mayoria trahadonan na Setar N.V., via un pagina cera di Facebook. A haci e reunion asina aki door di e retonan rond di distanciamento social. El a duna un splicacion y despues a contesta hopi pregunta cu a bin padilanti for di miembresia. E tabata un forma masha habri, transparente y moderno pa comunica cu miembronan, loke hoi otro sindicato no a of ta haciendo ainda.
STT no a fiha posicion ainda
E sindicalista a bisa su miembronan cu, mirando e envergadura di e probemanan, cu no solamente S.T.T. sino mas sindicato no ta di acuerdo cu e plan aki. Por lo menos no manera cu e ta awo. A keda di reuni dialuna atrobe pa haya mas informacion pasobra Gobierno kier un compromiso mesora di e sindicatonan, pero STT ta sinti cu falta contesta ainda riba varios pregunta.
Dicon Corsou a haya mas yudansa cu Aruba?
Minister di Hulanda a manda un carta pa Gobierno y e miembronan di e sindicato a ricibi esaki. E ayudo financiero cu Corsou y St. Maarten a ricibi ta mas hopi cu Aruba. Aruba a ricibi 42.8 miyon pa wanta e golpinan den e dianan aki. Gobierno ta perdiendo 10 miyon den entrada di turismo y esaki ta bira algo delicado pa futuro.
Cortamento den salario na SETAR
Jeromin Kelly a repasa e plan cu Gobierno a bin cun’e, informando tur hende cu nan kier pa entrega 5% di salario y tur bonus, vakantie uitkering y dertiende maand. S.T.T ta representa e compania di telefon cu ta uno priva y a puntra si Gobierno ta paga ambtenaarnan 5% menos den salario nan ta spaar. Den caso di Setar, si nan paga 5% menos di e salario, e compania mes ta keda cu e placa. Te ainda no ta duidelijk unda e placa ta bay y ta papia cu esaki ta bay den un fondo.
STT: NO lo bende accionnan di SETAR
A puntra Minister President referente bendemento di share di Setar y e mandatario a informa cu esey no ta e idea, cu no lo bende share ni di Setar ni di WEB ni Elmar. Pa awo por ta trankil, pero pa dialuna si e sindicatonan bay di acuerdo cu e plan di Gobierno, esey lo bay Rijksministerraad y aki lo dicidi si e ta suficiente of no. A puntra kico lo ta e siguiente paso si esey no ta suficiente y a ricibi como contesta cu lo corta mas den presupuesto di Gobierno.
Minister y Parlamentarionan mester corta masSindicatonan ta haya cu Gobierno lo contribui un tiki y S.T.T. tambe ta pensa mescos. Di otro banda si nan mester carg’e, e ta conta pa henter Aruba. A puntra riba e otro trabounan manera, dokternan, abogado, luganan di seguro, banconan, etc. dicon nan no lo entrega. Esey tin preguntanan cu ta habri riba mesa y ta haci dificil cu sindicatonan por duna un contesta dialuna.
STT transparente
Pa por vota, S.T.T. lo manda un encuesta na su miembronan cu preguntanan si nan ta di acuerdo of no pa diferente punto. Lo check si ta haci esaki via un carta of electronico, mirando cu den statuut no ta para con pa haci esaki pero cu mester tin un votacion.
Tur sindicato mester ta di acuerdo, pero tin cu no ta di acuerdo. Kelly ta haya cu tur hende mester carga e peso aki hunto y no solamente un parti so. Tambe nan ta haya cu Gobierno tin di entrega mas.
