E ultimo simannan varios departamento di gobierno a tene control riguroso na sitionan di construccion hotelero. Un di e proyectonan cu a haya bishita di autoridad tabata St. Regis Hotel. E ta e prome hotel pa keda cla, na fin di e aña aki of comienso di otro aña. Ta uza varios compania di construccion pa por keda cla cu e proyecto na tempo, debi cu door di pandemia mes, e proyecto ta bastante atrasa. Pero, ta parce cu e companianan aki no ta canando e caminda corecto di busca permiso pa nan trahadonan.
Un fuente, cu tabata na e sitio pa control, a sigura cu e hotel ta conta cu alrededor di 400 trahado, via e companianan di construccion y cu por lo menos mita di nan, no tin nan papelnan na ordo, sea na DIMAS of tampoco ta inscribi na SVB. Consecuentemente, multanan masha halto a cay caba. Ta papia di multa di riba 100 mil florin pa no a inscribi e trahado na SVB of no a inscribie na Departamento di Impuesto of tampoco e tin un permiso di DIMAS pa e por ta na Aruba.
Multa di 1500 florin pa cada trahado ilegal
Mester menciona cu na SVb e multa ta conoci. Nan ta cobra e doño di trabou un multa administrativo di Afl. 1500 pa cada empleado cu nan haya na pia di trabou sin cu nan ta inscribi den e registro di SVb. Door di no haci esey, e doño di trabou ta priva e empleado pa por gosa di sosten di e seguro social den caso di malesa of otro reto cu e no por traha. Tambe e forma aki ta parce cu mas bien ta purba evadi belasting of cu cumplimento di pago na gobierno.
Pelea constant na trabou
Riba red social por constata cu casi semanalmente trahadonan na pia di trabou ta bringa cu otro. No solamente nan ta bringa, pero pa nan ta un alegria pa grab’e tambe y public’e riba Facebook. E realidad ta cu ey tin varios compania di construccion trahando y no ta tur trahado ta gosa di e mesun beneficionan y asina ta percura pa bastante tension na e sitio di construccion.
St. Regis tambe ta responsabel
Di acuerdo cu leynan local, e compania mes tambe ta core risico di haya multa of di para responsabel pa subcontratistanan cu ta opta pa emplea trahado ilegal pa haci trabou barata pa nan. E ta demostra un forma di no ta un bon ciudadano corporativo, ora cu como hotel bo mes no ta haci lo suficiente pa evita “cheap labour” riba bo tereno of di doño di negoshi cu ta keda sin paga impuesto pa nan trahadonan.
Realidad: Proceso di permiso ta complica
Pero di otro banda, no por kita for di bista e realidad cu e servicio na DIMAS, no obstante cu a move e director un banda, no ta drechando substancialmente. E echo cu hotelnan ta haya nan mes ta uza trahado indocumenta, no ta hustificabel, pero di otro banda ta pa mustra gobierno tambe cu mester bin cu formula mas eficiente y facil pa por logra yega na permiso. Nos sa caba cu no tin suficiente trahado den construccion pues pa purba “protega” trabou pa local, ta cera e mercado di tal forma cu hotel awo tin como 200 trahado sin papel! No tin suficiente espacio na Guarda nos Costa pa por detene tur tampoco y como tal awo mester mas bien uza e multa administrativo pa e doño di e proyecto y e contratistanan sinti e eror cu nan a comete aki, den nan cartera.
Tocante St. Regis Aruba
E proyecto di St. Regis ta un hotel cu ta consisti di 200 camber, 22 condo, casino, spa, restaurant specialisa y ‘three-meal restaurant’. E areanan di piscina ta amplio y construi na rand di e parke publico cu lo keda publico semper. St. Regis Aruba lo tin dos suite presidencial y 15% timeshare. Adicionalmente e ta conta cu 22 apartamento di 2 y 3 camber, cu tambe ta suite. E diferencia ta cu e apartamentonan tin e facilidadnan di cushina y wasmachine, cu ta algo tipico di hotelnan St. Regis. Pa tin e apartamento integra cu e hotel ta importante pasobra tin huespednan, principalmente esnan di Merca, cu ta desea pa yega na un apartamento y no solamente un camber di hotel. E construccion tabata planea pa finalisa caba y cu e apertura programa pa e ultimo trimester di aña 2022. Aruba ta e unico isla den Caribe, pafo di e teritorio Mericano, cu tin un St. Regis y un Ritz Carlton. No tin ningun isla den Caribe cu tin’e. Puerto Rico tin, pero e ta teritorio Mericano.
E storia di e tereno aki ta cuminsa for di mas cu 50 aña pasa
E tereno aki tabata den forma “eigendom” y perteneciendo na Aruba Palm Beach Club di Gai Eman. E aña exacto cu a otorga e tereno no ta conoci, pero e club tabata existi prome cu cualkier otro hotel a habri riba e strip ey. Na dado momento, door di debe cu e club a genera y no por a paga, Aruba Bank a tuma e club over y e tereno. Ta bon pa bisa cu pa e tempo ey, e tereno aki tabata un di e miho nan di Aruba, cu cara pa lama y cerca di beach, miho no por tabata kier.
E tereno a pasa di Aruba Bank pa Aruba Hotel Enterprizes
Aruba Hotel Enterprizes ta funda hopi aña pasa pa entre otro Dr. Eloy Arends, Michael Ruby di Washington DC y Eduardo de Veer. E intencion tabata e tempo ey pa busca financiado y cu e compania local, desaroya un hotel grandi na Aruba. Tur wowo tabata riba Hyatt Regency, pero na ultimo momento e cadena a cambia di plan y a introduci Jose Joaquin Gonzales Gorondona for di Venezuela, cu a cumpra Aruba Hotel Entreprizes over y a desaroya Aruba Concorde Hotel & Casino. Cu tempo e comerciante a traha Concorde Hotel na Isla Margarita tambe, na Venezuela. Ta den e cuadro pa desaroya y amplia e propiedad di Aruba Concorde Hotel & Casino, Gorondona a cumpra e tereno di Aruba Palm Beach Club for di Aruba Bank.
Aruba Hotel Enterprizes a pasa pa otro doño
Cu tempo, e conocido Alfonso Riverol, tambe procedente for di Venezuela, a cumpra Aruba Hotel Enterprizes for di Jose Joaquin Gonzales Gorondona. E tabata esun cu a pidi Gobierno di Aruba e tempo ey pa mas tereno ainda, separa di esun original di Aruba Palm Beach Club, pa e por a desaroya un hotel nobo di Time Sharing. Ora a pidi pa mas tereno, den cuadro pa por tin e terenonan hunto, el a opta pa cambia e tereno “eigendom” pa “erfpacht”. Mester bisa cu e proyecto aki sinembargo nunca mas a bay dor. Na aña 2004 a cuminsa e proceso pa pasa e tereno di Aruba Hotel Enterprizes pa Caledonia Properties NV, di e mesun Alfonso Riverol. Un ke otro a keda cla na aña 2006, ora Minister Marisol Lopez-Tromp a firma pa traspasa e tereno aki di un compania pa otro, aunke e ta erfpacht. Es mas, den e mesun acta aki a duna nan un pida tereno adicional den e “wetland” banda di The Mill Resorts, pa fungi como parkeerplaats di e hotel nobo.
Tereno a bin cay den man di Starwood
Na momento cu Alfonso Riverol a bende Aruba Hotel Enterprizes cu Belfonti Capital Partners, tur e propiedadnan aki y e tereno a pasa tambe den e acta di benta. Cu tempo e cumprado nobo no por a cumpli cu su debe, cu consecuencia cu e banco a bay cu e compania y e propiedadnan den beslag. E banco, pa por a baha su “exposure” cu e debe grandi y e propiedad cu no tabata alcansa e suma presta, a bende e tereno cu e compania Starwood di Merca. Starwood tabata operando e hotel pa e banco. Despues cu Marriott International a cumpra Starwood, e tereno a pasa tambe pa nan. Ora di bende e propiedad di banco pa Riu Hotels, e pida tereno ey no a bay den e benta. El a keda tur tempo den man di Marriott.
Marriott kier a bende e tereno pa 17 miyon dollar
Entre aña 2013 pa 2017, abogadonan di Marriott Resort Aruba a presenta na Gobierno di Aruba cu e peticion pa bende “nan” tereno erfpacht cu Desaroyos Hotelco di Walter Stipa pa e bunita suma di 17 miyon dollar. E tempo ey e Minister di Infrastructura a nenga di coopera, pasobra e hotel ta bendiendo un tereno propiedad di Gobierno pa un suma asina halto. Tambe a tene cuenta cu e scarsedad di beach eybanda pa acomoda mas turista pasobra ya caba The Mill Resort (cu un djis o bira Marriott Courtyard) ta uza e mesun pida beach ey pa su huespednan. Esaki sin conta cu nos propio ciudadanonan semper gusta bishita e beach eynan, net dilanti Strand Politie.
A duna Marriott permiso pa traspasa e tereno toch
Mester menciona cu dia 29 di augustus 2017, menos di 1 luna prome cu eleccion, Ministernan Mike de Meza y Benny Sevinger a firma un carta pa abogado Johan Sjiem Fat, den cual nan ta bay di acuerdo cu e cambionan den e condicionnan bou cual a otorga e tereno “erfpacht” na Caledonia Properties N.V. Den e carta aki ambos Minister a acorda cu Marriott, cu a cumpra Starwood, lo por pasa e tereno aki pa un otro compania (of desaroyador) si nan bay di acuerdo cu nan condicion cu lo opera un hotel di nan marca na e sitio. E tempo ey a acorda cu ta cambia e condicion di traha un hotel Time Share, pa un hotel regular y casino cu 350 camber, compaña pa tur otro facilidad cu normalmente ta otorga na un propiedad asina. Cu e carta aki bou man, ta haci masha dificil awor pa stroba e compania di desaroya e mes of laga un otro desaroya un hotel di su marca na e mesun sitio aki.
Carta Ministernan Sevinger-de Meza
A pone prome piedra na december 2018
E proyecto di Sr. Regis Hotel Aruba tabata programa pa start na december 2018, ora cu Desaroyos Hotelco pone e prome piedra pa construi e hotel di 200 camber, situa entre Riu Antillas y Divi Phoenix, dilanti di Strand Politie. Ta trata aki di un inversion di 170 miyon dollar, na man di e Desaroyos Hotelco di e conocido Walter Stipa, cu ta e mesun doño awor di e edificio di Ritz Carlton Aruba. Stipa na Venezuela ta propietario di varios hotel di e mesun marca aki, manera Ritz Carlton, Marriott y Renaissance, pa menciona algun. Nan ta pronostica cu lo dura 3 aña p acaba di construi e hotel. Den e proceso lo muda e Warda di Polis pa un otro sitio.
Tocante Aruba Palm Beach Club
Masha poco hende kisas ta corda cu e sitio indica unda lo bay construi e hotel nobo, den pasado tabata un di e prome clubnan social di nos pais, esta Aruba Palm Beach Club. E tempo ey no tabata existi J.E. Irausquin Boulevard mes eydilanti y ta for di Saliña mester a crusa riba un caminda di santo pa yega eynan. Unda awe ta Holiday Inn Hotel tabata Club POVA di Polis. Prome cu e bin desaroyo di hotel na Aruba, ta e dos clubnan social aki tabata existi riba e beach. Ey e pueblo tabata acudi pa entrene nan mes na lama den fin di siman. Aruba Palm Beach Club por ehempel tabatin un bar, un restaurant, baño y lockerroom pa cambia paña of warda tas mientras cu ta bay landa den laman. Presidente di e club tabata Gai Eman.
Tocante St. Regis Hotels & Resorts
St. Regis Hotels & Resorts ta un cadena di hotelnan luhoso, cu ta forma parti di Starwood Hotel Group, cu ta doño di Marriott International. E cadena di hotel aki a inicia desde aña 1904, ora cu John Jacob Astor IV a habri St. Regis Hotel na New York City, na Merca. Starwood Hotel Group a cumpra e cadena aki na aña 1999. Te cu aña 2017, tin un total di 62 hotel cu ta carga e nomber di Sr. Regis rond mundo.
