Desde basta tempo Algemene Ziektekosten Verzekering (AZV) ta manda pashent exterior pa nan ricibi tratamento medico. Pero, pa ocho aña caba tin un pashent cu ta den exterior pasobra e ta ricibiendo tratamento medico.
ir. Edwin Jacobs, director di AZV, a splica cu riba e proceso ora di manda un pashent exterior, un specialista cu ta trata e asegurado ta pidi AZV pa mand’e afo pasobra e no ta haya cuido na Aruba. Nan tin un comision independiente di dokter cu ta evalua e peticion. E comision aki ta determina si en realidad no por duna e pashent cuido na Aruba.
Na momento cu e comision conseha AZV riba e echo cu no por duna e cuido aki na Aruba, nan ta manda e pashent afo. Ora cu e dokter sea na Colombia of Hulanda informa cu e pashent a termina cu su tratamento, no necesariamente e ta bin. Esaki ta debi cu nan tin di manda tur rapport y aki abou, e specialista cu a manda pidi ta dicidi si e por tuma over e tratamento.
E director a splica cu si e specialista no por tuma over, e ora pashent mester keda den exterior ta ricibi e tratamento. Esey ta pasa cu e pashentnan cu ta keda un periodo largo afo. E specialista ta esun cu ta bisa loke e pashent tin di sigui haya, e como specialista no por carga responsabilidad p’e. Esey ta pone cu e persona ta keda den exterior te un dia cu nan por logra haya e cuido aki na Aruba.