Den un rueda di prensa Minister di Finansa hunto cu e directornan di Departamento di Impuesto (DIMP) y Aduana a duna un presentacion riba e BBO aan de grens. Na varios ocasion e gremionan Comerciantenan Uni di Aruba (CUA) y Aruba Trade and Industry Association (ATIA) a vocifera di no tin tur informacion y si haya algo ta via media.
mr. Xiomara Maduro, Minister di Finansa, a splica cu nan tin ronda di informacion cu ya caba a cuminsa tuma luga. DIMP tin ful un lista di esunnan cu a haya e presentacion caba. Tambe tin e lista di esunnan cu ainda falta pa haya e informacionnan. Importante ta cu e brokernan, esunnan cu ta trata cu e parti di importacion, nan a haya e informacion for di Aduana.
mr. Luenne Gomez-Pietersz, directora di Departamento di Impuesto, a splica cu desde dia 13 di april nan tabatin e Wholesaler Association cu a haya e informacion. El a sigui splica cu dia 18 di april CUA tabata cerca nan y a intercambia pensamento, informacion tecnico. ATIA tabatin un reunion mucho mas prome cu a cuminsa cu e ronda di stakeholder. Mirando cu ATIA tabatin varios otro preocupacion p’e cambionan di impuesto cu a sosode entrante prome di januari 2023, segun e directora, nan a haya e primicia di informacion di e BBO bij invoer durante un reunion cu a dura casi tres ora largo.
Nan a pasa riba e preocupacionnan di e gremio. DIMP ta keda semper habri pa duna informacion. Pa loke ta trata e lista, nan a sinta cu San Nicolas Business Association, CUA, Wholesaler Association. Henter luna di april nan a sinta cu tur stakeholder cu ta hopi importante, esunnan cu ta traha cu e sistema di BBO of na frontera cu Aduana of cu DIMP mes ora di entrega BBO.
