E tema di abuso sexual di menor ta un tema cu ultimamente ta hopi den boca di pueblo. Loke ta remarcabel ta cu diferente instancia no ta papia facil riba e tema aki. Pero no pa Fundacion Telefon pa Hubentud, conoci como 131.
131 ta un number hopi conoci. Hasta ora di wega, mayornan ta haci uzo di e number aki. Telefon pa Hubentud tey pa hopi aña. Segun Erol Zebeda, miembro di e directiva di e fundacion, a splica cu nan ta existi pa 20 aña caba. For di momento cu nan a cuminsa, nan a cuminsa deal cu diferente topico den nos comunidad.
Telefon pa Hubentud ta traha 7 dia pa siman brindando sosten na e hobennan
Telefon pa Hubentud ta traha 7 dia pa siman brindando sosten na e hobennan. Click e link pa mas https://24ora.tv/2WxUneE
Posted by 24ora on Saturday, May 11, 2019
Obhetivo di TPH ta pa e muchanan por yama y vocifera si tin algo cu ta molestia nan y por ta riba diferente tereno. E por ta violencia, por ta abuso, por ta problemanan na scol, por ta problemanan familiar. Tur e informacionnan aki cu a haya, e boluntarionan ta tuma informacion ey y ta wordo poni den rapport. Obhetivo ta pa e rapport ey yega cerca gobierno y otro instancianan pa nan por wak kico ta e cifranan y por traha cu e cifranan cu ta suministra.
Nan tin dos obhetivo: uno ta yuda e hoben via telefon, via email, via chat, etc. y atrabes di e presentacion cu ta duna na scol.
E di dos ta, tur e informacion aki ta yega bek pa comunidad. En berdad nan ta haya yamada y e informacion ey tin poni registra.
Tur aña ta raporta tur loke TPH ta haci y pa tur instancia.
Boluntarionan selecta
E boluntario cu ta traha pa TPH, ta personanan den comunidad y nan ta wordo selecta. Ta haci entrevista cu e persona, wak si ta cuadra cu e trabao di e fundacion y tur ta haya un training. Tur aña minimo, ta duna un training 3 biaha na e boluntarionan pa nan tin informacion di cosnan cu ta pasa den comunidad.
131 ta conoci
E forma cu e mayornan ta uza 131 como wega, toch ta algo positivo. E obhetivo ta pa sigui hopi aña mas pa duna e hoben sosten den comunidad.
Yamadanan diario
Segun James Sneek, nan ta habri 7 dia pa siman, di 2’or di merdia pa 6’or di atardi. Eynan ta ricibi yamada y chat di tur hoben y mucha di Aruba. E por bay riba diferente tema. Nan ta dicidi di kico nan kier papia y tambe ta dicidi con largo nan kier papia riba un tema.
Sneek a menciona cu un di e temanan cu e mucha ta yama ta abuso sexual. Hobennan cu a yega di wordo mishi, por ta algo cu a pasa recien of algo cu a pasa un tempo pasa. Loke cu ta haci ta, na e momento cu e hoben yama, e yamada ta anonimo. Esey ta nifica cu no por wak, no por sa ken ta yamando. Esey a ripara cu hustamente ta un drempel averahe pa e mucha cu e hoben, cu te ainda e no tin un hende pa e papia riba esaki, yama 131 pa papia riba e tema. Esey ta duna nan un siguransa cu nan por papia sin cu un hende ta huzga nan y duna nan e guia, unda nan mester bay, pa e ayudo cu nan tin mester.
Loke cu ta wak ta, y e tema aki ta algo cu no mester lubida, muchanan ta fiel na nan mayornan. Muchanan ta yama 131 y ta bisa cu e ta wordo mishi door di e tata of stiefvader of opa. Loke e mucha kier ta pa e stop. Ey por mira e parti cu ta haci e tema aki asina delicado. E mucha ta asina fiel na su mayornan. E mucha ta esun cu sa cu na momento cu e haci un melding, kico lo pasa cun’e. Na momento cu e mester poni fo’i cas, tin luga p’e unda e tin cu bay? Asina poco poco ta duna e mucha guia pa asina e yega na e instancianan oficial cu por sigui cu esaki.
Den caso di 131, esaki ta anonimo. Ta purba di wak den e mucha su netwerk, na scol, e docente cu e tin bon contacto cun’e, e hoofd di scol, e IB’er, e trahado social, e tanta, e bon bisiña, e coach den e club deportivo. Asina aki ta purba cu toch e mucha por yega na e canal indica pa asina e por haya e ayudo.
Loke tin cu bisa tambe, nan tin un instrumento cu yama Orea Special. E ta hinca den un protocol di cooperacion, hunto cu Bureau Sostenemi, unda cu tin cu bay fungi como meldpunto di Aruba. Na momento cu un mucha yama 131 y e bisa cu e kier haci un melding di un violacion, na e momento ey ta yega den contacto via un 3way call cu Bureau Sostenemi. E momento ey, e mentor, mucha y e Bureau Sostenemi, ta bin hunto den un combersacion y ta pasa e yamada over, pa asina Bureau Sostenemi sigui cu loke ta e caso.
Na momento cu un mucha yama y e mucha bisa cu e kier haci un melding, mester percura pa haci uzo di e oportunidad ey. No ta tur dia e persona ey cu wordo mishi, tin e durf di bin dilanti y bisa cu un hende a of ta mishi cun’e y kier pa e cos aki stop.
