E presidente, mr. Eunice A. Saleh, di Corte Comun di Husticia di Aruba, Curaçao, Sint Maarten y di Bonaire, Sint Eustatius y Saba ta anuncia cu entrante 17 juli 2021, mr. Monica Helena Johanna Kock, ta apunta como presidente di Conseho Electoral di Aruba a base di un beschikking cu tin fecha 1 di juli 2021.
E vice-presidente di Algemene Rekenkamer Aruba, mr. Frederick Nuboer, CAMS, ta anuncia cu entrante 17 di juli 2021, mr. Rosslin Marchena ta apunta como presidente suplente di Conseho Electoral di Aruba a base di un beschikking cu tin fecha 1 di juli 2021.
Conforme articulo 5, paragraf 2, di Landsverordening politieke partijen (AB 2001 no.96) e nombracion di presidente y presidente suplente di Conseho Electoral di Aruba, ta apunta door di e presidente di Corte Comun di Husticia y door di e presidente di Algemene Rekenkamer Aruba.
Teniendo na cuenta cu e nombracion, di mr. dr. Glenn Albert Edward Thodé y. mr. ing. Hubert Cirilo Maduro, e actual presidente y presidente suplente, ta limita na un periodo di 4 aña y cu esaki lo caba dia 16 di juli 2021, ta necesario pa apunta e candidatonan nobo pa dicho funcion.
Despues di consulta intensivo, Kock y Marchena tabata dispuesto pa tuma e puestonan di presidente y presidente suplente na nan encargo.
E presidente di Corte Comun di Husticia y e vice-presidente di Algemene Rekenkamer Aruba ta desea Kock y Marchena tur clase di exito pa loke ta trata nan funcion nobo. Na mes momento ta gradici Thodé y Maduro pa nan compromiso y experiencia pa por a fungi den e puestonan durante e ultimo 4 añanan. Awemainta Nuboer a ricibi bishita di Maduro na oficina di Algemene Rekenkamer Aruba pa por a gradicie personalmente.
