Recientemente tabatin un caso den Corte di un docente poni den un posicion di conrector na Colegio Arubano y despues di un aña a dicidi cu no kier’e mas eynan. E no a keda contento y a bay Corte. Aunke cu Corte a dun’e rason, no por a haci mucho mas pa motibo cu a yena e vacatura en cuestion caba. Y crea un di cuater posicion no ta posibel pa falta di subsidio.
Ta trata di e docente Suyenne Tromp kende a cuminsa e caso contra Stichting Voortgezet Onderwijs Aruba (SVOA).
A trata e caso mes den luna di juni. Manera ta conoci, SVOA ta e fundacion sin finnan lucrativo cu ta maneha scolnan avansa na Aruba, bou di cual ta cay Colegio Arubano. E gastonan di scolnan special ta wordo subsidia door di Gobierno di Aruba.
Den caso di señora Tromp, e ta docente den servicio di SVOA desde october, 2010.
E sentencia di Corte a keda publica recientemente riba www.rechtspraak.nl y ta bisa lo siguiente.
Entrante prome di augustus, 2020, a nombr’e den e funcion di conrector na Colegio Arubano, pa e nivel di Havo-4 y Vwo-5. Un funcion di lider cu extra oranan y un compensacion di 25% riba e salario. En total Colegio Arubano tin 4 conrector y e tabata e ultimo pa nombra.
A resulta cu Directie Onderwijs, den nomber di Minister di Enseñansa, Ciencia y Desaroyo Duradero, dia 23 di september, 2019, a dicidi cu lo no subsidia e compensacion pa un di cuater conrector.
SVOA berdad a bay den obhecion contra e decision aki pero dia 10 di augustus, 2021 a declara su obhecion sin base.
No a keda SVOA nada otro cu informa Tromp, por escrito y fecha 29 di augustus 2021, cu desde prome di augustus, 2021, e lo no ta ocupando e funcion di conrector mas.
Den e carta a splica Tromp cual tabata e decision di e Minister, cu nan a bay den obhecion pero a perde e caso.
Despues di e ultimo decision di e Minister, directiva di SVOA a dicidi cu nan no ta bay den apelacion riba e decision ministerial aki, pa motibo cu e directiva ta haya cu e motivacion di e comision di obhecion di ‘Landsverordening Administratieve Rechtspraak (LAR), tin base.
Tur e situacionnan combina ta haci cu entrante prome di augustus, 2021, Colegio Arubano mester funciona cu tres conrector. Pa e motibo ey no tin espacio mas pa e ocupa e funcion ey.
A base di esey a propone Tromp pa entrante prome di augustus, 2021, nombr’e pa un aña den un funcion (pa cual no tabatin un nomber ainda), cu ta un trabou similar na loke e lo mester a haci como Conrector.
E compensacion ta sigui igual cu e salario subsidia door di Gobierno di Aruba mas compensacion di 25%. Pa mei, 2022, mester tene un combersacion di evaluacion y directiva lo re-evalua e conrectorado, pa tuma un decision definitivo pa loke ta e constelacion di e conrectorado y su eventual participacion den esaki.
Ora cu el a ricibi e carta aki, e skirbi riba dje “niet akkoord. Onder voorbehoud van al mijn rechten”. Y den e aña 2021 / 2022 el a sigui den e funcion di conrector.
Den un carta fecha 28 di augustus, 2021, el a informa SVOA cu e no por bay di acuerdo cu contenido di e carta di un dia prome, mirando cu e intencion di SVOA ta pa trece cambio den su nombramento como conrector y e condicionnan mara na e funcion. Esaki ta inaceptabel p’e.
Dia 13 di september, 2021, tabatin un combersacion entre e presidente di SVOA y Tromp y cu entrante prome di augustus, 2022, un conrector mester bay. Y a bis’e den un carta na september cu e mester tene cuenta cu esun cu mester bay ta e mes.
Na december a inform’e cu den e siguiente aña, na augustus 2022, ta sac’e for di e funcion di conrector y ta hinc’e den rooster normal como docente.
Den e carta a menciona cu tabatin algun keho contra dje, cu el acepta a ricibi training pa mehora esaki. Sinembargo e curso a cuminsa te finalisa y e no a registra su mes. E dos cosnan aki a pone nan tuma e decision pa pone riba rooster como docente. Y a bis’e tambe cu si den futuro habri e posicion mes, mirando e splicacion ariba menciona, e no ta bini na remarca pa e funcion.
A resulta cu na final di juni, 2022 un di e cuatro conrectornan di Colegio Arubano a tuma su retiro y a keda tres conrector, incluyendo Tromp. A nombra un otro persona den e posicion cu a habri.
Na januari, 2023 SVOA a cuminsa busca persona pa e funcion di conrtector (di tres), cu ta responsabel pa ciclo basico (1er y 2do aña) di Colegio Arubano. El a solicita, pero nan a bis’e cu no a seleccione pa e funcion.
Den e caso sumario di februari, 2023, a rechasa su peticion pa pone den e funcion temporalmente pasobra e caso no tin urgencia.
El a cuminsa un otro caso, pidiendo mesun cos, argumentando cu SVOA no a actua como un bon dunado di trabou y cu el a sinti su mes perhudica den su entrada, cu e decision tuma pa no haci uzo di dje den e posicion di conrector.
Corte den su decision a bisa cu ta berdad cu SVOA no ta haya subsidio mas di Gobierno pa e di cuater posicion di conrector.
No a convence cu argumento cu SVOA no por financia un di cuater funcion. E circunstancia aki a obliga SVOA tuma medida.
Durante tratamento di e caso SVOA a declara cu a tuma e medida ey contra Tromp, solamente basa riba e principio di ‘last in, first out’. E motivacion duna door di e anterior presidente di directiva no a conta mas. Pues Corte a compronde di esaki, cu e directiva nobo di SVOA a distancia nan mes di contenido di e carta ey
Sin tene cuenta si tabatin circunstancianan cu SVOA a haya pa duna un proposicion, si esaki tabata husto of no, si por a spera cu e mester a acept’e of no, Corte ta kere cu SVOA no a tene suficiente cuenta cu interes di Tromp.
Despues cu a inform’e cu e no ta haya e funcion di conrector mas pasobra un cupo a cay afo, dos biaha e posicion di e di tres conrector a keda liber. E prome ora cu ainda e tabata ocupa un funcion di conrector. No ta compronde pakico SVOA no a lag’e sigui e ocupa e funcion. Mas si e motibo pa sac’e di e funcion no tabata valido mas of a hala atras riba dje.
No ta compronde pakico no a lag’e tampoco simplemente pasobra e ta e ultimo cu a drenta. E splicacion cu otronan tambe mester haya un chens, no ta un argumento di peso pa pas’e voorbij.
Pues SVOA no a actua como un bon dunado di trabou.
E motivacionnan aki sinembargo den e procedura aki no ta sirbi. El a pidi pa pone bek den e funcion di conrector, of un funcion similar cu e mesun compensacion. Pero SVOA a bisa cu e funcion di conrector no ta disponibel mas (tur tres cupo ta yena caba) y no por crea un di cuater pa falta di subsidio. Y un posicion similar no ta existi den e organisacion.
Si bay di acuerdo cu e peticion, SVOA no por cumpli toch. No tin espacio pa otorga e peticion.
Pa e motibo ey ta rechasa e demandanan. Den e circunstancianan aki unda cu e demandanan ta wordo rechasa pero materialmente mira e no a perde e cas, Corte a dicidi pa compensa e gastonan den Corte. Esaki ta nifica cu cada un lo carga nan mesun gastonan.
