Roelien Hofman, cabesante Prinses Amalia Basisschool, a bisa cu a prepara cu hopi entusiasmo pa ricibi e muchanan den otro aña escolar nobo.
E ta masha agradecido na docentenan cu na final di vakantie ya caba a dedica varios dia pa prepara e klasnan pa ricibi e muchanan cu alegria. E aña’ki e scol tin registra 375 studiante, di cual 330 ta den basis y e restonan ta den e parti di kleuter.
Esnan cu ta cuminsa prome aña ta inicia esaki cu un metodo nobo di lesamento y matematica. Y masha importante ta cu nan ta bay cuminsa cu les di Hulandes tambe. Esaki ta algo nobo.
Na entrada di scol a pone un booth special pa e prome dia y cu a hala hopi atencion pa saca potret di e muchanan mes y hunto cu nan mayornan tambe.
Naturalmente e cabesante ta desea su alumnonan hopi exito y pa nan disfruta di e aña escolar cu hopi placer.
