A yega tempo pa nos tur pone man hunto y yuda tur esunnan cu ta den necesidad, segun nos forsa, pasobra si cada ken duna un man e asunto di necesidad di cosnan pa bay scol lo ta soluciona.
Ta para skirbi den 1 Juan 3:17 lo siguiente; Ma ken cu tin biennan di mundo y ta mira su ruman den necesidad y ta cera su curason pe, con e amor di Dios ta permanece aden?
Ta di berdad cu mester yuda hende pasobra den e buki di Deuteronomio 15:11 ta para skirbi lo siguiente: Pasobra lo no falta hende pober na tera, p’esey mi ta ordena bo bisando: Lo bo habri bo man hancho pa bo ruman, pa esun den necesidad y pa e hende pober na tera.
Hopi biaha iresponsabilidad ta trece necesidad; Por ehempel un mayor specialmente e tata sa di e necesidad di su yiunan y ta su deber pa cumpli cu ne. Pero si tur siman e mester cumpra un caha di cerbes di cualkier marca (No ta existi uno bao di cincuenta florin) of un longneck of mas grandi di whisky of otro bebida. Tur atardi mester dal un par di cerbes na Minimarket. Bo tabata sa cu tin hende cu tin cuenta pa bebe na Minimarket y cu tur ora nan ta cancela nan cuenta, pa nan por sigui bebe.
E uzo di droga, y cuenta cerca e bendedo di droga cual nan tin cu paga fielmente, pasobra ey bo ta hunga cu bo bida.
E bida inmoral di tin mas cu un muhe siendo bo ta casa y bo tin yiu pa cria, birando asina un homber cu ta cende luz na caya y laga bo propio cas den scuridad.
E gamblemento constante te cu ora casino mester prohibi bo entrada, pasobra di dia ta habri y bo no kier bay cas, bo ta burachi y kier sigui hunga placa.
E sclavitud di fia placa cu interes cu ta birando grandi, pasobra hopi tin e salarionan abao cu nan no por acerca un banco y asina nan cobra mester paga e fiado cu interes.
Hende muhe cu ta cobra onderstand y ta biba cu un homber cu ta drumi henter dia. E ta kita e tiki placa cu e muhe ta haya, bay uza e placa na droga, core paranda y despues termina ta maltrata e mesun muhe cu ta cria nan (No duda pasobra esey ta hopi cabayero cu ta core auto nechi) (2 Timoteo 3:7-8).
Y e muher aki tin yiu, y awor cu a yega ora di manda mucha scol, e” super homber” cu e ta biba cune no por yuda cu nada.
E bibamento for di forsa, gastando locual no tin, competi y envidia otro ta bobedad, y un forma di tenta Dios, y falta di sabiduria. Pasobra Dios su palabra ta bisa: Ma si cualkier di boso falta sabiduria laga e pidi Dios kende ta duna generosamente y sin reproche, y esaki lo ta duna na dje (Santiago 1:5).
Sabiduria y responsabilidad ta cana hunto, prome cu emocion, paranda, happy hour, y e famoso” gosa bida” mester tuma luga, laga nos tur como mayor pensa un rato kico mi yiunan mester, y kico ta prioridad den famia, e boter di whisky, e paranda di fin di siman of e responsabilidad di famia.
Responsabilidad ta bini prome cu diberticion.
Esun cu ta generoso lo ta bendiciona, pasobra e ta comparti su pan cu esun cu ta pober (Proverbionan 22:9).
Sinceramente,
Pastoor Marcel Balootje.
