Falta di pordon ta pica, keda wanta hende riba bo curason, ta haci daño fisico, mental y spiritual.Pa motibo di falta di pordon relacion cu Dios y cu hende ta keda perhudica. Falta di pordon ta perdemento di tempo y ta hopi biaha ta duna balor na algo cu e no tin. Pasobra si nos no pordona otro, Dios tampoco ta pordona nos, y es mas si nos no pordona otro di curason, nos lo keda carga e maleta di rabia, odio y amargura pa semper, pasobra enemigo lo keda lanta mesun cos cada rato.
Falta di pordon ta manera un flat tire, tur caminda cu e bay e ta zona. Confesion ta drecha nos relacion cu Dios, pa asina nos por sigui crece y avansa den bida. Pasobra esun cu sconde su pica lo no prospera.
1 Juan 3;1 ta para skirbi: Mira ki amor grandi e Tata a duna nos, cu nos por yama yuinan di Dios, y esey nos ta. P’esey mundo no conoce nos, pasobra e no conos’e. Pasobra antes boso tabata den scuridad, ma awor boso ta den luz, cana como yuinan di luz. Pasobra e fruta
di e luz ta consisti di tur bondad y husticia y berdad. ( Efesionan 5:8-9).
Un hende cu no ta pordona, of no kier pordona, pero cada rato ta bini cu cosnan bieu,cual e ta trata di rebaha otro cun’e y hustifica su mes , ta un persona cu ta biba den scuridad profundo, y ta solamente, confesion y pordon por sak’e for di su mundo di scuridad.
Ma Dios siendo rico den misericordia, pa motibo di su gran amor, cu cual E a stima nos. Hasta tempo cu nos tabata morto den nos picanan, a haci nos bibo hunto cu Cristo,( Pa medio di gracia boso a salba. ( Efesionan 2:4-5).
Cerca Señor nos Dios tin compasion y pordon, maske nos a rebeldia contra dj’e.( Daniel 9: 9). Ni prohimo, ni ruman lo no siña otro mas, bisando: Conoce Señor, pasobra nan tur lo conoce Mi. For di esun di mas menos, te na esun di mas grandi Señor ta declara: Pasobra lo Mi pordona nan inikidad, y nan pica lo mi no corda mas. Curason di hende no ta traha pa warda rabia, tampoco falta di pordon. Nos no ta yama pa biba den
pasado di otro, pasobra den rabia y odio y cosnan bieu no tin reconciliacion.
Si no tin paz den nos bida, nos bida ta amarga, y pa medio di esey, otronan por keda contamina, specialmente ora tin rabia, odio y vengansa den Famia. Hobennan mester libra nan mes di cera pactonan diabolico cu otro di tuma vengansa pa otro, pasobra esey no ta di Dios. Laga tur amagura, furia rabia, griteria, y calumnia keda kita for di boso, hunto cu tur malisia. Y sea cariñoso cu otro, pordonando otro, mescos cu Dios den Cristo a pordona boso.( Efesionan 4:31-32. Pasobra lo Mi tin misericordia di nan inikidatnan, y lo Mi no corda nan picanan mas.( Hebreonan 8:12).
Haci alma di Bo sirbido contento,pasobra ta na Bo, Oh Señor mi ta halsa mi alma. Pasobra Abo Señor ta bon y cla pa pordona,y abundante den misericordia, pa tur esnan cu ta sclama na Bo.( Salmo 86:4-5).
Mustrami un señal pa bon, pa esnan cu ta odia mi mira esaki y keda na berguensa, pasobra Abo, Oh Señor a yuda mi y a consola mi. ( Salmo 86:17).
Mes leu cu pariba ta for di pabao mes leu E a aleha nos transgreshonan for di nos.
Sinceramente,
Pastor Marcel Balootje.
