Actualmente y te cu diahuebs dia 3 di november proximo ta tumando luga riba nos isla un conferencia organisa pa The World Bank Group y The Caribbean Catastrophe Risk Insurance Facility (CCRIF SPC). E encuentro na Renaissance Wind Creek Resort ta conta cu presencia di entidad y expertonan riba e tema, mientras cu e participantenan invita ta diesdos di e asina yama OCT (Overseas Countries & Territories) cu ta pais y teritorionan remoto. E topico of tema di e conferencia ta: Comprehensive Disaster Risk Management and Financial Resilience Workshop for Overseas Countries and Territories in the Caribbean.
E obhetivo general di e tayer di tres dia ta pa trece hunto stakeholders clave di sector publico for di e OCTnan denCaribe, organisacionnan regional y socionan den desaroyo pa discuti y comparti experiencianan den maneho di riesgo di desaster compleho (CDRM na Ingles) y proteccion financiero. Otro obhetivo clave di e tayer ta traha capacidad den un OCT su financiamento di riesgo di desaster.
Mary Boyer, kende ta un specialista di desaster na Banco Mundial, a bisa na 24ora.com cu e conferencia ta bin despues di tres aña di asistencia tecnico caminda ta busca pa crea resiliencia den sectornan di agricultura, energia, economia blauw y maneho general di desaster.
Isaac Anthony, CEO di CCRIF SPC a comenta cu esaki ta un iniciativa hopi importante pa nan. “Manera ta conoci, mundo henter ta confronta cu un cantidad grandi di desaster. Nos a wak kico a pasa na 2017 cu horcan Irma a impacta un cantidad di OCT manera St. Maarten, Turks & Caicos y e Islanan Birgen Britanico. Lamentablemente nos no por evita un desaster, pero loke si nos por haci ta prepara miho pa e yegada di un desaster. Yuda baha e impacto no riba e pais, pero si riba e bida y e hendenan.”
