Relaciona cu informacionan incorecto cu ta circula den nos comunidad tocante e “kill cage” situa na Wayaca, Departamento di Salud Publico ta reacciona como lo siguiente. Servicio Veterinario ta un seccion di Departamento di Salud Publico. 
E prome tarea di Servicio Veterinario ta e proteccion di salud y bienestar di e bestianan na Aruba, esaki contra hende y bestia mes. Bestianan no desea lamentablemente pa hopi aña caba ta wordo laga atras na “kill cage” door di nan doño y na un manera anonimo kita e responsabilidad di cuido di e animal for di riba nan. E motibo pakico e “kill cage” tey, ta pa preveni cu e bestianan no desea aki wordo poni riba caya y e cantidad di bestianan los riba caya sigui aumenta. Bestianan cu ta wordo laga atras na “kill cage”, Servicio Veterinario ta pone nan drumi na un manera responsabel haciendo uso di un injection cu ta internationalmente reconosi.
Tur aña un cantidad entre 4000 pa 5000 bestia ta wordo laga atras pa nan doño na “kill cage”. Gobierno ta stimula campañanan di sterilisacion bou bestianan cu ta los riba caya pa purba na reduci e cantidad. Doñonan di bestia tin e deber di respeta derecho di animal y brinda cuminda, dak, cuido, sterilisacion y amor na nan. Pa doñonan cu kier deshaci di nan bestia, tin opcionan disponibel pa haci esaki via anuncio den corant of otro medionan di comunicacion unda otro persona of instancia interesa por tuma e cuido di e bestia aki.
Na momento cu un persona ta desea un bestia of mascota e mester ta conciente cu e ta responabel na tur momento pa cuido di e bestia. Departamento di Salud Publico ta conta
riba colaboracion di cada un doño di bestia pa preveni cu mas bestia ta keda laga atras na
“kill cage” of los riba caya haciendo e cantidad di bestianan riba caya cada biaha mas hopi.
Pa mas informacion por tuma contacto cu Servicio Veterinario na telefon 585-1828 of
Departamento di Salud Publico na 522-4200.
