Awe durante dia, comunidad di crossfit lo topa na Centro Deportivo Betico Croes, pa asina organisa un evento caritativo, pa asina recauda fondo pa manda nan amigo Andres Hernandez bek pa Colombia, despues cu esaki a sufri un accidente basta serio diabierna cu a pasa.
Andres Hernandez ta na Aruba pa asina participa den un competencia di Crossfit. E tabata hunto cu su amigo Santiago Tobon coriendo na e parti nort di Aruba, ora cu nan a sufri e accidente, caminda cu Hernandez a keda seriamente herida.
Segun cu tin di compronde Hernandez, segun declaracion di su amigo Santiago Tobon riba un video cu el a comparti atrabes di su rednan social, e tin su ribchinan kibra, sangramento paden y otro sintomanan.
Andres ta un deportista di 24 aña cu ta practica Crossfit for di cinco aña pasa y a biaha pa Aruba pa representa su gym caminda e ta traha, mester oper’e di urgencia pa trata su lesionnan. E seguro di biahe ta cubri un parti, e pago di e honorarionan di hospital, pero nada mas y tin cu oper’e di urgencia, segun su mama Ana Milena Henao na e corant virtual El Pais.
Tur esaki tin su costo halto cun’e y ta pa e motibo aki mes su famianan kier pa e ta translad’e pa Cali di inmediato.
Ta pa e motibo aki mes su amigonan ta pidi cooperacion di henter pueblo di Aruba pa asina colabora cu loke bo tin, e por ta chikito mes, pa por yega na un suma pa por hiba e atleta Colombiano aki bek cas, pa asina e haya e tratamento adecua na su pais natal.
24ora.com lo ta live for di Centro Deportivo Betico Croes transmitiendo e evento aki awe merdia pa 1’or.
