Diabierna, 15 di Februari, a tuma luga un wega amistoso entre Superfood y Compra, cu a tuma luga riba e veld di sala di Britannia. Segun Ana Maria Ramirez, Unit Manager di Compra, nan ta hopi contento pa esaki.
E tabata tin e acogida den e iniciativa aki. E wega amistoso aki tabata un exito. Ta parti di e programa di Compra Activo, unda cu ta pone meta y yuda e empleadonan pa nan ta mas motiva. Nan ta pone metanan y asina motiva pa nan ta mas fisicamente activo, mas feliz y sigur mas saludabel.
Den e caso aki e ta un iniciativa mas special ainda, pasobra ta compartiendo pafo di oranan di trabao, no solamente cu e coleganan, pero cu e team di Superfood. Hopi colega a bin pa apoya. Tur dia nan ta un di e clientenan di Compra, pero ta hopi bon pa comparti cu nan den un atmosfera diferente.
Sigur cu nan ta contento cu e resultado. Compra a gana e wega amistoso aki. Nan ta hopi orguyoso di e team. Ta gradici Superfood pa tabata parti di esaki tambe y tur empleado cu a bin pa apoya e team di Compra Activo.
Sigur lo bay tin mas actividad, esaki ta como parti di e programa di Compra Activo. Pa e empleadonan di Compra, tin diferente actividad riba programa caba pa 2019. Esaki ta un biahe pa e Maraton di Medellin den luna di September. Tin varios actividad manera participacion den varios caminata, hikes, entre otro.
Pa loke ta Superfood, Peter Veen a menciona cu den e team tin un persona di varios departamento di e supermercado. Esaki sigur ta un bon iniciativa y asina por siña conoce otro bon. Den Superfood, tin diferente tipo di hende trahando y e manera aki ta un otro forma pa por trata otro.
Gerencia di Superfood a haya cu e wega aki tabata uno sumamente positivo y no solmente e empleadonan a participa, sino tambe e part-timersnan tambe tabata tey. Sigur nan lo bay participa den mas actividad. Sigur e resultado tabata uno exitoso.
