Despues di a maneha e Fondo di Algemene Ziektekosten Verzekering (AZV) pa 24 aña largo, incluyendo su preparacion, lansamento y ehecucion, Anco Ringeling a baha cu pensioen na september 2018 y a laga su funcion pa Ruben Goedhoop. Pero su conocemento y experiencia riba maneho di un compania di seguro medico t’ey keto bay. E ta sinta 1 bez pa siman na AZV ainda pa sigui comparti su conocemento. Pero desde algun tempo e ta duna conseho tambe na Minister Lee di St. Maarten y na e “SVB” di Sint Maarten cu nan ta yama SZV, pa e preparacion, lansamento y ehecucion di nan National Health Insurance (NHI).
E plannan pa lansa un sorto di “AZV” na Sint Maarten ta data for di algun aña caba, por lo menos for di 2016. Pa diferente motibo ainda no a logra cristalisa e proyecto.
“Na e momento aki mi ta asistiendo St. Maarten via Grant Thorthon pa mehora e proceso unda pashentnan mester wordo referi pa exterior. Como cu St. Maarten no tabatin tur e specialismonan riba e isla mes, tin hopi mas pashent cu ta wordo referi pa exterior compara cu Aruba. St. Maarten ta trahando duro pa tin mas specialismo y specialista trahando na St. Maarten mes. Asina e cantidad di pashent cu mester wordo referi pa exterior por baha drasticamente”.
“Mi ta traha como un consultant y lo sigui biba na Aruba bulando ariba abou entre e dos islanan”, asina Anco Ringeling a duna di conoce, para riba pista di aeropuerto Prinses Juliana na Sint Maarten, prome cu aborda WinAir saliendo pa Aruba. E ta contento di regresa cas y orguyoso di bula den mesun vuelo cu un cantidad di otro Arubiano mas. Entre nan tambe e specialista Arubano di pulmon, Selene Kock cu tambe ta yuda na St. Maarten.
Anco Ringeling tabata envolvi den preparacion di AZV for di cuminsamento. Na aña 1994 Minister Charro Kelly a nombr’e como e prome director di AZV. El a aporta na e plannan, na ehecucion y a mira e baby nace na aña 2001 y crece te cu awendia AZV ta un adulto hoben di 18 aña di edad.
Ringeling a studia Sociaal Recht y tabata Director di Departamento di Asuntonan Social prome di a bay AZV. Te dia di awe ainda e ta un docente invita na Universidad di Aruba. El a bay laga AZV den un estado financiero solido, cu alrededor di 85 trahado, cu mas o menos 110 mil asegurado y manehando un presupuesto anual di mas di 400 miyon florin.
