Ya ta por lo menos dos luna caba, cu e compania JWP Advisory AG, procedente di Suisa, ta den negosacionnan avansa pa por haci inversionnan grandi den por lo menos dos pais den Caribe. Nan ta na mesa hunto cu e politico local, Michael Williams di Pueblo Prome. E inversionista Juergen W. Pichler ta evaluando varios proyecto pa sostene e economia di Aruba y di Surnam, hunto cu un grupo di demas inversionista internacional.
Na e momento aki, e delegacion a caba di termina negosacion cu Surnam, unda nan a topa cu Presidente di e pais, Chan Santokhi y varios consehero mas. Ey a repasa e plannan concreto riba mesa y con nan lo por aporta na economia di e pais, cu ta den necesidad di inversion stranhero pa yuda crece nan economia y crea cupo di trabou. E plannan cu e grupo ta mas interesa pa desaroya y mira cristalisa, ta inversion pa sostene agricultura na Surnam, pero tambe inversion den e sector di cuido medico y enseñansa. E suma cu a menciona cu nan tin pa inverti na e momento aki ta di un miyon Euro.
Durante e encuentro na Surnam, a topa cu e Minister di Relacionnan Exterior, cu e Minister di Finansa, cu Minister di Agricultura y varios parlamentario di Surnam. Si tur cos bay bon, lo anuncia e proyectonan acorda den e siguiente lunanan.
Mientrastanto e grupo ta buscando pa sinta cu Gobierno di Aruba tambe, pasobra nan tin hopi interes den nos isla. A keda di suministra mas detaye di nan plannan, despues di sinta na mesa cu mandatarionan local.
