Durante e conferencia di prensa cu a tene diabierna mainta, directiva di Comerciantenan Uni Aruba a tuma oportunidad pa bolbe tira un advertencia den direccion di gobierno pa loke ta e implementacion di BTW. Ta kere cu si ta bay door cu su introduccion pa 1 di januari 2023, lo conoce hopi fayo mescos cu a sosode ora cu a pone BBO. Miembronan di directiva, Francis Saladin Jr. y Frans Ponson a hiba palabra.
“BTW en principio ta un concepto bon. Nos ta di acuerdo cu BTW. E problema cu nos tin cu BTW ta e tarifa. Nos ta papia cu nos kier un sistema di un tarifa di 10% maximo pa tur cos. Anto duna comercio un chens pa prepara su mes pa implement’e,” asina Francis Saladin Jr. a indica.
CUA ta kere cu nan sector, esta comercio, dado momento ta tanto mas nan por wanta. “Abo como gobierno si ta contrata hende, bo ta subi prijs manera bo ta desea, bo ta bin cu BTW. Claro, asina mi tambe por core auto Lincoln nobo electrico,” e empresario a remarca. “Cada rato ta kita mas y mas di mi como pueblo pa disfruta di mi entrada door di maneho malo di gobierno y ta impacta bida y comercio directamente.”
Frans Ponson a bisa cu BTW ta bay yuda cu compliance, pero ta un sistema cu ningun comerciante a traha cu ne. No por implement’e den dos pa tres luna. BBO mes ainda, despues di 15 aña, tin comerciante ta hacie fout. “Awor kier implementa BTW den seis luna. CUA ta pro BTW pero na e manera corecto.” Fuera di esey a bisa cu personalmente e no ta kere cu lo implement’e pa 1 di januari, pero cu si hacie toch, lo ta tur bruha y mita di e comerciantenan no ta bay hacie bon toch.
Pa lesa e relato completo, lesa TREMPAN
