Un estudio realisa pa Kaspersky y e consultora Chileno di estudionan di mercado, CORPA, ta revela cu 19 porciento di e hombernan Latino Americano ta admiti di ta wak contenidonan pa adulto riba computer na nan trabao.
Den e region, e Peruanonan ta esunan cu mas ta consumi e tipo di contenido aki cu un 26 porciento. Segun e sondeo, Brasil ta e di dos pais unda e hombernan cu mas ta wak pornografia na pia di trabao, representando un 24 porciento. Mientras cu e Mexicano y Argentinonan ta ocupa e di tres y di cuarto luga, cu un 19 porciento.
E estudio ta revela cu esnan cu menos ta sigura di wak potret y video di indole sexual na oficina, ta e Chilenonan (14 porciento) y e Colombianonan (12 porciento.
En cuanto e poblacion femenino, e Colombiananan ta esnan cu mas ta realisa e practica aki na nan trabao cu un 13 porciento. Na di dos luga ta e Peruananan, cu un 10 porciento, mientras cu e Mexicana y Brasileñanan, ta ocupa e di tres luga cu 9 porciento.
Di acuerdo cu expertonan, drenta den e tipo di sitenan aki por tin riesgo na algun ocasion. E cibercriminalnan sa sconde Banking Troyans den e reproductornan di video porno pa asina horta e informacion bancario di e usuarionan.
Segun un estudio di Kaspesky Lab, realisa na 2017, e tipo di codigonan malicioso aki ta ocupa e di dos luga entre e malwarenan mas extendi cu ta wordo acciona pa pornografia.
Den hopi caso, nan ta usa un programa malicioso conoci como scareware, cu ta blokia e pantaya y ta mustra un mensahe cu ta indica cu a detecta contenido ilegal y por lo tanto, e dispositivo a wordo blokea. Pa desblokie, e victima mester paga un rescate. Dmitry Bestuzhev, director di e Ekipo di Investigacion y Analisis pa Kaspersky Lab America Latina, ta señala cu “e riesgo di infeccion ta existi y e ta presente tanto den websitenan pa adulto, como den esnan cu no tin nada di haber cu pornografia. Den e caso di e prome, e estafadornan ta bon prepara pa atraer e usuarionan,” e ta bisa. “E practicanan poco riguroso di algun colaborador por ocasiona dañonan grave na e companianan, ya cu ta aumenta e riesgo di filtracion di datonan corporativo confidencial,” e experto ta agrega.
