Un atentado terorista cu un autobom a registra pa mas of menos 9’or y mey di mainta di diahuebs na e Academia di Polis General Santander y a laga por lo menos nuebe morto y 54 herido, segun autoridadnan a confirma te asina leu.
E prome versionann ta señala cu un homber a yega coriendo un pickup te na e porta di e scol, ubica riba e autopista zuid di e capital di e pais. Na e controlnan di siguridad, un cacho antiexplosivo a detecta e peliger y ora cu e polisnan e guardia, a purba na detene e terorista, esaki a hisa speed di e auto y a dal un di e agentenan.
Desues el a avansa full speed durante poco mas di 200 meter y a explota ora cu el a pasa cerca di e alohamiento di e muhernan na e scol. E victimanan fatal ta algun di e studiantenan di e scol di Polis cu tabata na entrada di e edificio y tambe e agentenan cu a persegi e agresor.
E conductor ta entre e mortonan, segun fuentenan di Polis. Autoridadnan ta investigando si e explosivonan a wordo activa atrabes di un telefon celular, of a usa un timer. E detonacion a afecta e edificionan rond. “Mi tabta na porta di cas, mi ta biba riba di cinco piso y e cas a tembla, por a scucha e explosion hopi fuerte,” un di e testigonan ta conta.
Poco minuut prome cu e atentado terorista e ceremonia di ascenso di cadetenan di polis a caba. E cuentanan oficial di rednan social di e scol ta conta di e actonan cu a realisa parti mainta.
Autoridadnan di salud di Bogota a reporta cu e heridonan a traslada e heridonan na hospital El Tunal, na Policlinico di Olaya, hospital di Polis, Hospital Militar y Clinica de Occidente. Te awor aki ta conoci cu por lo menos tres herido ta den “estado di gravedad,” segun e Centro Regulador di Urgencia di Bogota a informa.
E presidente Ivan Duque, kende a delanta su agenda di Gobierno na Quibdo, Choco, a bolbe bek na e capital y lo reuni cu funcionarionan halto di gobierno y Forsanan Militar na e scol mes, mientras tur e partidonan politico a condena e atentado terorista y e ciudadania a expresa su rechaso a lo largo di e pais.
“Mi a duna orden na Forsa Publico pa determina e autornan di e atake aki y hibanan na husticia. Tur e Colombianonan ta rechasa terorismo y nos ta uni pa enfrenta esaki,” e Presidente a bisa. Segun Secretaria di e Gobierno di Bogota, varios di e mobilisacionnan ciudadano premira pa awe, diahuebs, den e ciudad, a keda cancela.
