E aña aki sigur ta un aña diferente pa Colegio EPI, segun director general, Ryan Maduro. El a splica, cu nan ta preparando apesar di tur e desafionan. Basicamente nan no a bay cu vakantie. Na momento cu scol a cera, un grupo a keda traha pa asina por prepara con ta presenta enseñansa pa e aña escolar nobo.
Aworaki nan ta bin cu un modelo hibrido cu ta nifica 50% face to face, 50% online. Ta den e proceso di preparacion ainda.
Scolnan ta cera te cu dia 3 di september y ta duna un poco espacio pa haci mas preparacion y ta loke nan ta haciendo.
Diabierna, 21 di augustus tabata e prome dia cu a ricibi e docentenan y a haci’e na un forma hopi special.
Retonan
Segun Maduro, e retonan ta diverso. Por bisa cu por ehempel ta sigui conta cu studiantenan cu no tin nan ekiponan pa nan por haci nan les online. Tin hopi problema social na cas cu a constata, cu studiantenan ta 17 aña bay ariba y nan tin problemanan social cu nan ta deal cun’e. Ta purba di duna nan apoyo den esaki.
E sistema di internet tampoco ta esun optimal, segun Maduro, cual e ta bisa ta un critica constructivo, y ta algo cu en realidad mester mehora pa si kier bay completamente online. Esaki ta un di e condicionnan necesario.
Fuera di esey ta bezig ta dunando habilidadnan, conocemento na e docentenan di EPI, pa nan tambe. Online ta algo cu nan no tabata custuma cu ne. Ta preparado nan awor aki cu conocemento, training, diferente sesion cu ta haci pa nan por haya e conocemento con nan ta anda cu nan lesnan online.
Tin varios desafio. Maduro tin hopi confiansa den e team. Nan ta hendenan hopi capacita. Nan a duna tur nan compromiso y por mira cu nan ta dedicando 100% pa por haci esaki posibel pa e studiantenan.
Studiantenan nobo
Esnan nobo a caba di haci un proceso di intake, cual ta algo normal na EPI, caminda cu ta pidi nan yena un formulario pa asina sa kico ta loke nan ta bin cu ne pa loke ta nan bista social y personal.
Dialuna tin combersacion cu nan y esey ta bay sosode online. E mentornan ta contact cada studiante den e dianan aki pa duna nan tur informacion cu nan mester haya. Ta compronde cu den e prome aña hopi biaha nan ta un poco perdi y e mentornan ta haciendo nan best pa por guia nan den e proceso aki.
Maduro ta bisa cu mester compronde, cu EPI tabata tin un programa prepara prome cu dialuna ultimo a anuncia cu scolnan ta keda cera. Ora cu a anuncia esey, di biaha mester a bolter full nan programa. Tabata tin reunionnan urgente pa nan por prepara kico nan ta bay haci.
Tin di bisa cu e ta bayendo basta bon. E mentornan ta guia e studiantenan di prome aña. Si en caso cu e studiantenan no a haya comunicacion cu scol pa subi nan pagina di Facebook. Tin hopi informacion ey riba pa sa con pa comunica cu e unidad of cu e scol pa por haya e informacion necesario.
Deseonan
Segun Maduro, Aruba ta pasando den un situacion hopi dificil. E ta un situacion di crisis y ta lanta hopi emocion y situacion cu nos no kier. Ta importante pa keda focus riba e parti positivo. Si bay den pasado, ta ripara cu nos pais a pasa den asina hopi crisis y toch a sa di sali afo. No tin duda cu e capacidad di nos tur, si nos uni nos esfuersonan, enbes di cay den negativismo, lo logra sali p’adilanti pronto.
Hubileo
Diabierna tabata un dia special tambe. A duna un bon bini na e docentenan normal. Ta un tradicion cu ta organisa un personeelsdag. Den e ultimo dos añanan a hiba e cuerpo completo bay riba De Palm Island. Pero cu e situacion actual ta bira imposibel. A dicidi cu ta haci algo special. A organisa un Drive Thru caminda tur unidad y afdeling ta pasa. Tabata tin diferente pakete di cuminda, di snacks, nan a haya T-shirt. Pa EPI, e docentenan ta frontliners y kier a reconoce nan y plus a reconoce tur esnan cu a cumpli aña di hubilario na Colegio EPI, entre 10, 15 y hasta 20 aña pa pone nan un rato “in het zonnetje” y reconoce nan pa nan esfuerso.
