Den 2019 e colaboracion entre Cosecha y EPB Oranjestad ta continua. Aña pasa Cosecha y EPB Oranjestad a cuminsa un colaboracion inovativo cu studiantenan di e Departamento di Moda na EPB Oranjestad.
Cosecha ta pone e vitrinanan di su tienda na San Nicolas disponibel na e desaroyo educativo di e studiantenan. Studiantenan di e Departamento di Moda ta siña diferente materia durante nan trayectoria na EPB Oranjestad, pa por prepara nan pa un carera profesional.
Pa e materia di Etalage, e studiantenan tin e oportunidad pa por practica locual nan a siña den teoria y expresa nan creatividad manera debe ser, usando un tienda di berdad.
Desde e luna aki tin un vitrina nobo na Cosecha, decora door di e studiantenan cu ta desaroyando nan talento como Etaluese o Etaleur. Bou di guia di juffrouw Rhona Lemminga cu no ta desconoci como fashion designer den e mundo di moda na Aruba y tambe internacionalmente, e studiantenan a decora pa e temporada aki vitrinas den tema di Carnaval y Dia di Valentin, un fusion jama “Love and Carnaval”.
Ta di aplaudi cu e studiantenan mes a traha tur cos nan mes, di vestido te back drop. Cosecha su tienda, cu ta bende Artesania y Arte Local y cu Seyo Nacional di Artesania, ta honra di tambe por ta parti di e desaroyo di nos futuro profesionalnan den industria creativo.
EPB Oranjestad y Cosecha kier invita publico pa bin admira e trabou di e studiantenan ambicioso y creativo cu Aruba tin.
Cosecha San Nicolas ta den caya di Promenade na San Nicolas y ta habri di 10.00-18.00 riba diamars pa diasabra y di 13.00-18.00 riba dialuna.Pa mas informacion por tuma contacto cu Cosecha San Nicolas na telefoon 5878708 of Cosecha Oranjestad na telefoon 5878709. Tambe por bishita e Facebook page di Cosecha: www.facebook.com/Aruba-Cosecha.
