“ODCA, e organisacion cu ta conta cu 27 partido miembro, representando 23 pais den Centro, Sur America y Caribe ta un factor sumamente importante pa fomenta y fortalece e balornan riba cua e partidonan Social Cristian, cu enfoke humanista ta recoge nan ideolgia y vision pa futuro. Pa e motibo aki mi a sinti mi mes bendiciona y honra di por a representa Partido AVP na e di 23 Congreso Statutario di ODCA na Mexico”, tabata palabranan di Clifford Heyliger riba su particpacion na e congreso importante aki. Recientemente Clifford Heyliger tabata nombra tambe den e directiva nobo di AVP y encarga cu tema di relacionan internacional. Esaki tabata su prome mision representando AVP y Aruba internacionalmente.
“Mi a drenta politica, pasobra di mi fe, mi creencia cu ta fortifica mi conviccion cu sirbishi publico mester ta compaña cu un mision humano transcendental. Nos caminda pa dilanti mester ta ancra fuertemente den balor profundo. Amor prohimo mester ta nos guia continuo, e marco di referencia pa nos duna contenido y busca e bon comun pa nos pais y sociedad. Den ODCA ta contempla y profundisa continuamente e temanan aki y p’esey mi a sinti e balor grandi di a haya e oportunidad pa a representa AVP na e congreso aki”, Clifford Heyliger a subraya.
E honor aki a haya un dimension mas local y cerca na momento cu Heyliger por tabata parti di e votacion na e Congreso cu a eligi lider di partido, Mike Eman como vice-presidente di e instituto aki hunto cu un presidente nobo den calidad di Mariana Gómez del Campo Gurza (Partido Acción Nacional, Mexico). Un reconocemento importante pa Aruba, AVP y Mike Eman cu prome tabata Vice-Presidente pa e area di Caribe y awo a bira un dje vice-presidentenan di henter e organisacion.
Clifford Heyliger a splica cu e temanan di e congreso tabata varia pero a enfoca principalmente riba e principionan Cristian Democrata cu ta; solidaridad, responsabilidad comparti, equidad publico y nos responsabildad pa e futuro. Hopi pais ta sufriendo pa falta di liderasgo cu vision y un guia transcendental. E concepto di amor prohimo y e buskeda di e bon comun ta bay perdi den paisnan caminda e gobernacionan no ta mira mas e nececidad di pueblo, pero unicamente kier busca y mantene poder den un forma totalitario pa privilegia un grupo selecto, mientras e pueblo ta sufri.
Unabes mas den ODCA a reafirma nan compromiso pa ofrece nan pueblonan den e paisnan e caminda di bon comun, sea den gobernacionan of den opcion alternativa pa gobernacion cu ta riba e mal caminda.
Clifford Heyliger ta subraya cu amor prohimo ta pone cu bo ta mira, scucha y sinti bo mes como politico un cu e nececidnan den pueblo, nan ta bo rumannan. “E ta pone cu bo ta realisa cu gobernacion no ta pa bo partidarionan, pero pa tur bo rumannan. E ta pone cu bo ta realisa cu bo ta un yiu di esnan cu a bay bo dilanti. Cu respet y gratitud pa nan sacrificio, cu conocemento di nan balornan bo ta biba den e presente y bataya hunto cu bo rumannan pa un presente y futuro prometedor. Realisando cada biaha tambe cu bo ta un ruman grandi pa esunnan cu mester bin ainda.” “You are your borthers’ keeper” Clifford a enfatisa. Asina, mientras bo ta esforsa bo mes cu balor humanista pa haci e presente miho bo ta habri caminda pa e futuro.
“Unicamente cu un strea di guia bo por ta para asina den e presente, conectando pasado cu futuro y futuro cu pasado. E buskeda di e bon comun ta e kompas.” Den ODCA, Clifford Heyliger a splica “ta e temanan aki di nos responsabilidad nos a reflecciona riba dje y a subraya e caminda padilanti. Locual nos ta haci tambe den AVP.”
Clifford Heyliger a splica tambe cu den e conferencia anterior na Costa Rica den cua Mike Eman y Robert Candelaria a representa AVP a acorda un resolucion pa AVP tuma e iniciativa pa establece na Aruba un Centro di Formacion Politico pa region. E concepto aki ya AVP ta desaroyando hunto cu Ryçond Santo do Nascimento den Fundacion Digna Lacle Herrera. Awo cu COVID a pasa por bay dun’e e contenido internacional y regional manera acorda cu ODCA.
“Mi a bin bek cu hopi animo pa sigui lucha y sigur hopi inspira pa a mira e admiracion cu tin pa partido AVP y nos lider Mike Eman, kende a haya hopi elogio di e presidente saliente, Juan Carlos Latorre y esun entrante. Ambos a expresa nan admiracion pa e calidadnan humano di nos lider y visionnan desplega den liderasgo na Aruba y contento cu e lo ta den e team nobo di ODCA”. Clifford Heyliger ta hopi satisfecho cu su participacion na ODCA.
