E boxdo Clayton Raven ta bek na Aruba despues di a participa den e evento di Enfusion na Alemania. Raven a bringa den e categoria di riba 80 kilo. E ta bek na cas pero e no a bin man bashi.
Na su brasa e tabatin e faha di boxeo, cu el a ricibi despues di gana su contricante. Ta un faha extra riba su nomber, ya e tin algun faha caba. Na su yegada, a ricibie un monton di persona.
Tabata un momento sumamente bunita. Caminda cu borchi, blaas y buya a ricibie den e “arrival hall.” Famia y amigo a dun’e un caluroso bonbini.
Durante un entrevista cu Raven, el a conta cu; e deseo di su mama, famia y fanatico semper tabata pidi p’e, el a cumpli cu nan. A bin cu e faha di campeon pa su pais.
E pelea a bay miho cu e mes a spera, segun por a compronde for di e boxdo. Na prome instante el a premira un pelea mucho mas duro. A pensa di lo a bringa 5 rond, pero a logra termina e pelea den apenas e di dos rond. E preparacion tabata hopi pero na final por mira un bon resultado.
E pelea tabatin diferente factor cu a contribui n’e logro. No solamente e mes como atleta pero su manager y coach tambe ta hunga un rol grandi. “Train hard, fight easy”, asina Clayton Raven a subraya durante e entrevista cu representante di Headlines Group.
El a sinti su mes confortabel den e categoria cu el a bringa. Patras di su exito tin un historia largo. Raven su mama cu awe no t’ey mas cu ne, semper tabata desea p’e logra e titulo di campeon, awe e por bati riba su pecho cu orguyo y bisa cu: “Mi a logr’e.”
Esey ta su motivacion tambe, su mama, omo y famia. Tabatin un temporada cu e kier a stop cu boxing, pero su mama a presenta den su soño y for di e dia ey, el a sigui persevera te cu awe e tin tres faha di campeon.
