Den un denuncia publico relaciona cu mal practica den cuido medico, Diana Castro a conta cu algun diescinco dia atras el a haya un dolor fuerte na su abdomen. Pa esaki el a acudi na hospital y segun Castro, personal di hospital no a atende manera debe ser y cu e ta compronde cu esaki no ta facil ya cu e no ta su propio pais. Sinembargo, e ta sinti cu akinan a viola su derecho como ser humano.
El a conta cu el a yega cu su dolor y ya e tabata tur troci di tanto dolor cu e tabatin. El a drenta triage caminda e nurse a puntr’e kico e ta sinti. Aki el a splica cu e tin hopi dolor den su area abdominal y cu esaki a pone cu el a haya sacamento. E nurse a bis’e cu e lo bay dun’e un remedi pa e sacamento y cu despues e mester bay sinta warda pa dokter atende cu ne. Loke e no a spera ta cu e sacamento a empeora.
Ora dokter a atende, el a bis’e cu e tin inflamacion y a dun’e algun receta di remedi pa esaki. Castro a busca esakinan y a bebe esakinan debidamente. Algun dia a pasa pero su situacion a sigui empeora, mas dolor y mas sacamento sin mira mehoracion. Pa cobertura mas amplio lesa edicion di TREMPAN mañan.
