Desde 7 di juni te cu 30 di juni un otro grupo di tata a participa na e proyecto Best Dad Ever. Fundacion Telefon pa Hubentud Aruba conhuntamente cu Tienda di Educacion a facilita Best Dad Ever na un grupo di 5 tata forma pa Centro di Desaroyo di Hende Muher.
Banda di e servicionan cu Centro di Desaroyo di Hende Muher ta ofrece na e hende muhenan na Aruba pa desaroya nan mes, Centro di Desaroyo di Hende Muher tambe ta ofrece diferente servicio na hende homber. E hende homber den relacion y/of den e famia, ta importante den e sosten pa e hende muhe su desaroyo. Basa riba esaki Centro di Desaroyo di Hende Muher a acerca Fundacion Telefon pa Hubentud Aruba y Tienda di Educacion ta facilita Best Dad Ever na un grupo di tata.
E tatanan cu a participa a ricibi diferente conseho, informacion y conocemento pa asina nan por ta mas involucra ainda den educacion di nan yiunan. Tambe e tatanan a trece nan preocupacion dilanti, nan a enfoca riba kico nan a ricibi den nan educacion cu nan ta desea di sigui cu ne y kico nan no lo implementa den e bida di nan yiunan y nan a intercambia di experiencia cu otro. Best Dad Ever ta enfoca riba e importancia pa e tata ta involucra den bida di su yiunan.
Cuido, violencia, necesidad y derecho di mucha, embaraso y division di cuido ta algun di e temanan cu a trata durante Best Dad Ever. Na final e tatanan cu a participa na Best Dad Ever a ricibi un certificado.
Un danki ta bay na Fundacion Telefon pa Hubentud Aruba y Tienda di Educacion pa facilita Best Dad Ever cerca nos na Centro di Desaroyo di Hende Muher. Tambe un gradicimento ta bay na Famia Planea Aruba y partera Stephanie Daal pa nan participacion den Best Dad Ever. Pa mas informacion tocante diferente servico di Centro di Desaroyo di Hende Muher por tuma contacto cu nos na via nos Facebook page: CEDEHM (Centro di Desaroyo di Hende Muhe), Email: [email protected] of Telefon 588-1391.
