El a keda exactamente bintitres ora cera despues cu fiscal a saca ordo di detencion pa tanto Christopher Williams como Kevin Wever. Ambos ta sospechoso den e caso di bringamento y destruccion den e area hotelero.
Awe, alrededor di 3:20 pm fiscal a dicidi di laga Christopher Williams bek den libertad. Williams mescos cu Wever a entrega nan mes ayera na warda di polis na Shaba.
Awo ta pendiente pa wak kico lo ta e proximo paso den e asunto aki of si awo si a yega un punto final. Pa Nigel Williams, ruman di Christopher Williams, e ta cla cu henter e descordia aki. Simplemente cu e no a acepta cu yiu di minister-president a insult’e y hasta purba scupie den hende.
Christopher Williams a atende un interogacion pisa awe diasabra. El a para riba cu e kier sa ken a entrega keho contra dje di destruccion (vernieling) pasobra den e grabacion por mira cla cu e no a destrui nada den e luga. Mas bien el a sinti cu recherchenan a purba saca mas for di dje pa mira si e por incrimina otro sospechoso. El a nenga di haci esey y hasta a nenga di firma su interogacion na final.
Polis a delibera cu fiscal di e caso y a dicidi pa laga Chris bek den libertad, mustrando cu su detencion no ta necesario mas. No ta conoci pa nos si Kevin Wever a keda deteni.
