E hoben Sean Michael Urbina, naci dia 29 di augustus 2003, pues di apenas 16 aña di edad, ta chauffeur di un di e autonan envolvi awe 5:00am den e accidente na Pos Chikito. Testnan a constata cu e tabata bou influencia di alcohol. Sinembargo e ta den un estado critico di salud, debi na multiple fracturanan y complicacionnan, entre otro cu su ader principal, cu por ta masha peligroso. Dokternan na Aruba a informa famia awe mainta cu no por haci nada pe aki y atardi laat caba a pone riba Air Ambulance pa transport’e pa Bucaramanga, Colombia, pa ricibi tratamento medico specialisa.
Su famia y amigonan a pidi oracion pe awe riba red social, pa e por recupera su salud y surpasa e retonan cu e ta confrontando actualmente. Ta recientemente el a caba Filomena College MAVO y mira con el a bay fia auto di su mama pa bay cumpra cuminda marduga y a haya su mes envolvi den un desgracia asina serio.
Varios Specialista a atende cune aki durante e tabata interna den Intensive Care Unit (ICU) na Dr. Horacio E. Oduber Hospitaal pa purba brind’e cuido, aunke e circunstancianan ta masha serio mes. Parce cu e sla mas duro tabata den su banda y como tal el a kibra ribchi por ehempel cu a bora su pulmon y asina dun’e problema cu halamento di rosea. Cada un reto a rekeri un specialista diferente pa atende cune. E hoben aki tabata stuur un auto RHD.
E prome 72 oranan awo ta crucial pa determina e tecuperacion cu lo por tin den un caso asina. Specialistanan na Colombia ta den contacto cu esunnan di Aruba pa garantisa cu ta continua cu e mesun cuido inicial di Aruba, pero awo cu ekiponan y personal specialisa specialmente den e area di curason.
