E persona na kende Mike Eman kier a dedica e plasa importante den cuna di gobernacion di Aruba ta Juan Chabaya ‘Padu’ Lampe. Padu a biba pa mira e reconocimento grandi aki. Un shon di hende, stima y aprecia pa tur cu conoce.

Un persona sumamente talentoso, creativo y inspirativo. Padu tabata un di e compositornan di nos himno nacional “Aruba Dushi Tera’. Banda di tabata un musico cu a produci cancionnan inolvidabel manera e di e dos himno di Aruba ‘Abo So’, Padu tabata tambe un pintor y un autor di bukinan metafisico.

Pero mas ainda Padu tabata un luchado di prome ora di nos Status Aparte. E lucha di e humilde pueblo Arubiano a inicio den siglo pasa. Un lucha sagrado, un anhelo grandi, un deseo cu despues di hopi contratiempo a keda realisa na 1986. Mescos ta e amor incondicional cu Aruba henter tin pa Padu, e icono Arubiano, nos tata di cultura.

Na momento di ceremonia di groundbreaking di Plaza Padu e tempo ey Prome Minister Mike Eman a elogia Padu cu e siguiente palabranan. “Ta poco personalidad nos tin na Aruba cu a duna un contribucion na e aspecto politico y e desaroyo constitucional y a duna un contribucion balioso pa eternidad den crea e vinculonan entre nos como ciudadanonan cu e suelonan stima di nos dushi tera Aruba”.

Un centro di gobernacion cu ampliacion y su propio plaza, estilo Binnenhof como parti di renobacion di Centro di Ciudad dedica na un baluarte di nos Pais, Padu Lampe cu lo biba pa semper den nos curason.

Cu hopi amor, aprecio y respet pa un personalidad excepcional cu a acapara nos curason cu su amor pa nos Pueblo y orguyo di nos Dushi Tera: nos Padu Lampe. E a merece di mira y sinti e aprecio di su Pueblo y Pais na bida. Nos ta sinti husticia den nos curason awe cu nos Padu por a mira e dedicacion di e majestuoso PLASA PADU den centro di Aruba su gobernacion dedica na Tata di AMOR Y ORGUYO pa nos Pais, nos Padu.

Na momento di despedi di Padu, Ex Prome Minister Mike Eman a refleha riba e momento aki cu e siguiente palabranan: “Na tur bishita cerca Padu e ultimo añanan cu su edad mas halto y salud mas fragiel nos sa den nos mente cu nos ta mas serca di e momento di despedida, pero nos curason nunca ta cla pa e dia di awe cu Padu a laga nos pa semper. Un personahe excepcional den talento, inteligencia y amor pa su Aruba Dushi Tera y nos Pueblo. Un perdida gigantesco pa Aruba, pa Fichi (Vivian Lampe) su yiu cu no a lag’e ningun momento y a dedica y totalmente na Padu awe nos ta expresa na Fichi, Victor, Erwin y Sonia y famia tuma nos brasa di consuelo cu tur nos amor y respet pa Padu como muestra di nos amor p’e y di henter Aruba.  Padu Lampe ta keda graba pa semper den nos curason y curason di henter nos Pueblo y Pais”.

Comments

comments