Diasabra alrededor di 5:50 pm polis a para un auto marca KIA modelo Cerato, color blauw, numera A-41800 riba Lloyd G. Smith Boulevard. E chauffeur tabata stuur basta malo riba caminda treciendo trafico na peliger. Polis a par’e na altura di bufete di abogado Kloes, na e crusada di Smith Boulevard y Adriaan Lacle Boulevard.
Pero ora cu autoridad a controla e chauffeur, a pidie baha fo’i auto y a constata cu casi e no por a para riba su pianan. Tambe a nota cu e tabata papia cu un lenga “pisa”, cu ta indicacionnan cu probablemente e ta betra.
A deten’e y transport’e pa ward’i polis pa ey present’e dilanti un subfiscal pa atende cu ne riba su acto. Stuur auto burachi ta motibo pa pasa un diasabra anochi cera den un cel.
