Desde ayera y te cu otro siman, lo tin dos avion staciona na Aruba, conoci como e Hurricane Hunters. Nan ta avionnan di Merca cu ta bula door di situacionnan di tempo, di ciclonnan tropical, manera horcan.
Nan trabou ta pa procesa datonan di tempo. E dos organisacionnan cu ta haci e trabou aki ta United States Air Force Reserve‘s 53rd Weather Reconnaissance Squadron y tambe e National Oceanic and Atmospheric Administration‘s Hurricane Hunters. Por lo menos un di e avionnan aki ta staciona awo na Aeropuerto Internacional Reina Beatrix.
E prome vuelo cu humano abordo cu a pasa door di horcan, a sosode na aña 1943. Den pasado no tabatin satelitenan profesional pa detecta tormentanan tropical.
Tabata uza avionnan militar pa haci e tipo di vuelonan asina. Awendia, cu tur tecnologia moderno, meteorologonan ta capas pa detecta ciclonnan prome nan forma, pero cu e avionnan aki por midi e presion di un horcan y provee informacion valioso y sigur di velocidad di biento, pa asina por predeci e desaroyo y movecion di un horcan.
Ta bon pa enfatisa cu Bureau Rampenbestrijding Aruba (BRA) ta den contacto masha estrecho cu e “Operation Commander” di Hurricane Hunters, cu tin nan base na Florida, na Merca. Nan ta uza Aruba pa nan personal di cabina por descansa y despues continua cu nan operacionnan den e mal tempo cu ta pasando den Caribe y cerca di Florida. Di e forma aki Aruba tambe ta brinda asistencia y sosten na e operacion pa henter e area ta bon na altura, cu informacion clave y sigur, di e tormentanan tropical cu ta birando activo den e siguiente simannan.
